Mosquitoes | హెలికాప్టర్‌లలో దోమలను తీసుకెళ్లి వదులుతున్న హవాయి సర్కారు.. ఎందుకంటే..!

Mosquitoes | అమెరికాలోని హవాయి రాష్ట్రంలో మగదోమలను హెలికాప్టర్లలో తీసుకెళ్లి గాల్లో వదులుతున్నారు. దోమలను తీసుకెళ్లి గాల్లో వదలడం దేనికి అనుకుంటున్నారా..? ఇలా దోమలను వదలడం వల్ల ప్రయోజనం ఏమిటి..? అని ఆలోచిస్తున్నారా..? ప్రత్యేకంగా మగ దోమలనే ఎందుకు వదులుతున్నారనే సందేహం మీ మదిలో మెదులుతోందా..? అయితే మీరు దీనిగురించి పూర్తి వివరాలు తెలుసుకోవాల్సిందే.

Mosquitoes : అమెరికాలోని హవాయి రాష్ట్రంలో మగదోమలను హెలికాప్టర్లలో తీసుకెళ్లి గాల్లో వదులుతున్నారు. దోమలను తీసుకెళ్లి గాల్లో వదలడం దేనికి అనుకుంటున్నారా..? ఇలా దోమలను వదలడం వల్ల ప్రయోజనం ఏమిటి..? అని ఆలోచిస్తున్నారా..? ప్రత్యేకంగా మగ దోమలనే ఎందుకు వదులుతున్నారనే సందేహం మీ మదిలో మెదులుతోందా..? అయితే మీరు దీనిగురించి పూర్తి వివరాలు తెలుసుకోవాల్సిందే.

హవాయి రాష్ట్రంలో కొన్ని అరుదైన పక్షి జాతులు అంతరించిపోతున్నాయి. వాటిని కాపాడుకునేందుకు ఆ రాష్ట్ర పాలనా యంత్రాంగం వినూత్న చర్యలు చేపట్టింది. బ్యాక్టీరియాతో కూడిన లక్షలాది ప్రత్యేక దోమలను హెలికాప్టర్లలో పైకి తీసుకెళ్లి వదిలిపెడుతోంది. ఇలా ఇప్పటికే కోటి దోమలను వదిలింది. అందమైన హవాయి దీవుల్లో ఇప్పటికే 33 రకాల పక్షి జాతులు అంతరించిపోయాయని స్థానిక ప్రభుత్వం గుర్తించింది. మరో 17 రకాల పక్షి జాతులు ముప్పును ఎదుర్కొంటున్నాయి. వాటిలో కొన్ని మరో ఏడాదిలోనే కనుమరుగయ్యే ప్రమాదం ఉంది.

‘అకికికి’ అనే పక్షుల సంఖ్య 2018లో 450 ఉండగా, 2023 నాటికి ఐదుకు పడిపోయింది. ఇప్పుడు ఒకటి మాత్రమే మిగిలి ఉందని అంచనా వేస్తున్నారు. ఇలాంటి పరిణామాలపై పర్యావరణవేత్తలు ఆందోళన వ్యక్తం చేస్తుండటంతో హవాయి ప్రభుత్వం అత్యవసర చర్యలు చేపట్టింది. అందుకోసం భారీ స్థాయిలో దోమలను హెలికాప్టర్ల సాయంతో విడుదల చేస్తోంది. ఇలా ప్రతివారం హెలికాప్లర్ల ద్వారా 2.5 లక్షల మగ దోమలను తీసుకువస్తున్నారు. ఇప్పటివరకు కోటి దోమలను వివిధ ప్రదేశాల్లో విడిచిపెట్టారు.

హవాయిలో మాత్రమే కనిపించే కొన్ని అరుదైన పక్షిజాతులు మలేరియా ముప్పును ఎదుర్కొంటున్నాయి. వ్యాధికారక దోమ కుడితే 90 శాతం అవి చనిపోయే ప్రమాదం ఉంది. మలేరియాను ఎదుర్కొనే రోగ నిరోధక శక్తి ఆ పక్షులకు లేకపోవడమే అందుకు కారణం. అందుకు పరిష్కారం కోసం ఒల్బాకియా అనే బ్యాక్టీరియాతో కూడిన మగదోమలను ఉత్పత్తి చేసి హెలికాప్టర్లతో వదులుతున్నారు. ఈ మగదోమలను కలిసిన ఆడ దోమలను గుడ్లు పొదగవు. దాంతో ఉత్పత్తి జరగదు. అలా క్రమంగా దోమల సంఖ్య తగ్గిపోతుందనే ఉద్దేశంతో హవాయి సర్కారు ఈ వినూత్న చర్యలు చేపట్టింది.

దీన్ని ఇనకంపాటబుల్‌ ఇన్‌సెక్ట్‌ టెక్నిక్‌గా వ్యవహరిస్తారట. ఆమెరికా నేషనల్‌ పార్క్‌ సర్వీస్‌ సాయంతో హవాయి రాష్ట్ర ప్రభుత్వం ఈ ప్రాజెక్టును చేపట్టింది. చైనా, మెక్సికోలో దోమల సంఖ్యను తగ్గించేందుకు ఇదే విధానాన్ని అనుసరించారు.