మాస్కో: రష్యా యుద్ధ నౌక మాస్క్వా మునిగిపోయింది. నల్ల సముద్రంలో ఉన్న రష్యా నౌకాదళ శ్రేణిలో మిస్సైల్ క్రూయిజర్ మాస్క్వా కీలక నౌకగా ఇన్నాళ్లూ సేవలు అందించింది. అయితే ఆ నౌకను తామే పేల్చివేసినట్లు ఉక్రెయిన్ చెబుతోంది. కానీ మాస్క్వా నౌకలో పేలుడు జరిగిందని, ధ్వంసమైన ఆ నౌకను తీరానికి తరలిస్తున్న సమయంలో.. తుఫాన్ వాతావరణం కారణంగా మునిగిపోయినట్లు రష్యా రక్షణశాఖ వెల్లడించింది. మాస్క్వా నౌకలో ప్రమాదం జరిగిన సయమంలో అది ఒడిసా పట్టణానికి సుమారు 90 కిలోమీటర్ల దూరంలో ఉంది. నౌకలో ఉన్న ఆయుధాగారంలో పేలుడు జరిగిందని, దాని వల్లే అది తీవ్రంగా ధ్వంసమైనట్లు రష్యా మిలిటరీ చెప్పింది. అయితే అక్కడ ఉన్న ఇతర నౌకల్లో మాస్క్వా సిబ్బందిని తరలించినట్లు వెల్లడించారు. మాస్వా నౌకను నెప్ట్యూన్ మిస్సైల్తో పేల్చివేసినట్లు ఉక్రెయిన్ ప్రకటించిన విషయం తెలిసిందే. మాస్క్వా యుద్ధ నౌక ఘటనకు సంబంధించి అమెరికా ఎటువంటి ప్రకటన చేయలేదు.