మైక్రో, నానో ప్లాస్టిక్‌తో గుండెపోటు!

మైక్రో, నానో ప్లాస్టిక్‌ మనుషుల ఆరోగ్యానికి పెనుముప్పుగా మారుతున్నాయి. శరీరంలోకి చేరుతున్న మైక్రో, నానో ప్లాస్టిక్‌ వల్ల గుండెపోటు, క్యాన్సర్‌ ముప్పు పెరుగుతుందని ఇటలీకి పరిశోధకులు గుర్తించారు.

లండన్‌: మైక్రో, నానో ప్లాస్టిక్‌ మనుషుల ఆరోగ్యానికి పెనుముప్పుగా మారుతున్నాయి. శరీరంలోకి చేరుతున్న మైక్రో, నానో ప్లాస్టిక్‌ వల్ల గుండెపోటు, క్యాన్సర్‌ ముప్పు పెరుగుతుందని ఇటలీకి పరిశోధకులు గుర్తించారు. ఇందుకు సంబంధించిన వివరాలు న్యూ ఇంగ్లాండ్‌ జర్నల్‌ ఆఫ్‌ మెడిసిన్‌లో ప్రచురితమయ్యాయి. కరోటిడ్‌ ఆర్టెరీల్లో(మెదడుకు రక్త సరఫరా చేసేందుకు మెడకు ఇరువైపులా ఉండే ధమనులు) నానో ప్లాస్టిక్స్‌ ఉన్న వారిలో గుండెపోటు వచ్చే ముప్పు ఇతరుల కంటే రెట్టింపు అవుతున్నట్టు వీరు తేల్చారు. కరోటిడ్‌ ఆర్టెరీలను చెడు కొలెస్ట్రాల్‌ బ్లాక్‌ చేసినట్టుగానే నానోప్లాస్టిక్స్‌ వల్ల కూడా జరుగుతుందని పేర్కొన్నారు.

కరోటిడ్‌ ఎండార్టెరెక్టోమీ చేసి తొలగించిన 257 మంది కరోటిడ్‌ అర్టెరీలపై అధ్యయనం జరిపిన పరిశోధకులు ఈ విషయాన్ని గుర్తించారు. మనుషుల జబ్బులకు, ప్లాస్టిక్‌కు సంబంధముందని గుర్తించిన మొదటి అధ్యయనం ఇదేనని, గుండెసంబంధ సమస్యలకు ప్లాస్టిక్‌ కారణమని తమ అధ్యయనంలో గుర్తించినట్టు ప్రొఫెసర్‌ రఫేలె మార్ఫెల్లా తెలిపారు. 0.2 ఇంచుల నుంచి ఒక ఇంచులో 25,000వ వంతు వరకు పరిణామంలో ఉండే ప్లాస్టిక్‌ శకలాలను మైక్రో ప్లాస్టిక్‌గా పరిగణిస్తారు. ఇంతకంటే చిన్నగా ఉంటే ప్లాస్టిక్‌ శకలాలను నానో ప్లాస్టిక్‌గా పిలుస్తారు.