వృద్ధుడికి సహాయకుడిగా ఉంటూ.. దోచేశాడు

సిటీబ్యూరో, జూన్‌ 11(నమస్తే తెలంగాణ): ఓ వృద్ధుడికి సహాయకుడిగా ఉంటూ.. అతని డెబిట్‌ కార్డు వివరాలను తెలుసుకొని డబ్బులు కొట్టేసిన ఓ యువకుడిని శుక్రవారం రాచకొండ సైబర్‌ క్రైం పోలీసులు అరెస్ట్‌ చేశారు. సైబర్‌ క్రైం పోలీసులు తెలిపిన వివరాల ప్రకారం… ఫలక్‌నుమా ప్రాంతానికి చెందిన వినయ్‌రెడ్డి నాగోల్‌లోని రామకృష్ణా వృద్ధాశ్రమంలో సహాయకుడిగా పని చేస్తున్నాడు. అతన్ని ఫిబ్రవరిలో చేరిన ఓ వృద్ధుడికి సహాయకుడిగా నిర్వాహకులు నియమించారు. ఈ క్రమంలో ఆ వృద్ధుడి డెబిట్‌కార్డు వివరాలు తెలుసుకుని.. దాని ద్వారా అమెజాన్‌, ఫ్లిప్‌కార్ట్‌, జొమాటో, తదితర ఈ-కామర్స్‌ వెబ్‌సైట్స్‌ నుంచి దాదాపు రూ.1.57 లక్షల షాపింగ్‌ చేశాడు. ఇటీవల ఈ విషయాన్ని గమనించిన వృద్ధుడు.. వృద్ధాశ్రమం నిర్వాహకులకు సమాచారం అందించి.. పోలీసులకు ఫిర్యాదు చేశారు. దర్యాప్తులో భాగంగా సాంకేతిక ఆధారాలను సేకరించిన పోలీసులు.. నిందితుడు వినయ్‌రెడ్డిని శుక్రవారం అరెస్ట్‌ చేశారు.