Hyderabad | పెండ్లి చేసుకుంటానని నమ్మించి.. 6.3లక్షలకు టోకరా వేసిన మహిళ!

Hyderabad | మ్యాట్రీమోనీ వెబ్‌సైట్‌లో ప్రొఫైల్‌ చూసి పెండ్లి చేసుకుంటానంటూ ముందుకొచ్చిన ఓ మహిళ.. తాను స్టాక్‌ ట్రేడింగ్‌ చేస్తున్నానని అందులో మంచి లాభాలొస్తాయి, మన భవిష్యత్తు కోసం మీరు ఇన్వెస్ట్‌ చేయండంటూ నమ్మించి నగరానికి చెందిన ఒక ప్రైవేట్‌ ఉద్యోగికి రూ. 6.3 లక్షలు బురిడీ కొట్టించింది.

Hyderabad | సిటీబ్యూరో, ఫిబ్రవరి 5 (నమస్తే తెలంగాణ): మ్యాట్రీమోనీ వెబ్‌సైట్‌లో ప్రొఫైల్‌ చూసి పెండ్లి చేసుకుంటానంటూ ముందుకొచ్చిన ఓ మహిళ.. తాను స్టాక్‌ ట్రేడింగ్‌ చేస్తున్నానని అందులో మంచి లాభాలొస్తాయి, మన భవిష్యత్తు కోసం మీరు ఇన్వెస్ట్‌ చేయండంటూ నమ్మించి నగరానికి చెందిన ఒక ప్రైవేట్‌ ఉద్యోగికి రూ. 6.3 లక్షలు బురిడీ కొట్టించింది. ఓల్డ్‌ అల్వాల్‌లో నివాసముండే బాధితుడు ఒక ప్రైవేట్‌ కంపెనీలో అకౌంటెంట్‌గా పనిచేస్తున్నాడు. షాది.కామ్‌లో మీ ప్రొఫైల్‌ చూశానంటూ నందితారెడ్డి అనే పేరుతో ఓ యువతి బాధితుడిని కాంటాక్టు అయ్యింది.

ఇద్దరు వాట్సాప్‌ నెంబర్లు మార్చుకొని, 3 నెలల పాటు చాటింగ్‌ చేశారు. తనది విజయవాడ అని ప్రస్తుతం యూకేలో ఉన్నానని క్వాడ్‌కోడ్‌ఎఫ్‌ఎక్స్‌ అనే ట్రేడింగ్‌ కంపెనీలో పనిచేస్తున్నాననిపరిచయం చేసుకుంది. వీడియో కాల్స్‌లోనూ బాధితుడి కుటుంబ సభ్యులతో మాట్లాడింది. మనం పెండ్లి చేసుకున్న తరువాత ఆర్ధికంగా ఇబ్బందులు రాకుండా ఉండేందుకు ఇప్పటి నుంచి ఆర్ధికంగా బలపడాలని నీతులు చెప్పింది. తాను స్టాక్‌ ట్రేడింగ్‌లో ఎక్స్‌పర్ట్‌నని, తమ కంపెనీ క్వాడ్‌కోడ్‌ ఎఫ్‌ఎక్స్‌ యాప్‌ను గూగుల్‌ ప్లే స్టోర్‌ నుంచి డౌన్‌లోడ్‌ చేసుకోవాలంటూ సూచించింది.

పెండ్లి చేసుకోబోతున్నానని, తమ మంచికే చెబుతుందనే భరోసాతో బాధితుడు ఆమె చెప్పినట్లు యాప్‌ను డౌన్‌లోడ్‌ చేసి మొదట రూ.50వేలు పెట్టుబడి పెట్టాడు. స్క్రీన్‌పై అసలుతో పాటు లాభం కన్పించింది. దీంతో అది నిజమని నమ్ముతూ దఫ దఫాలుగా రూ.6.35 లక్షలు పెట్టుబడి పెట్టాడు. స్క్రీన్‌పై అసలుతో పాటు లాభాలు రూ.20 లక్షలు కన్పిస్తున్నాయి, వాటిని విత్‌ డ్రా చేసుకోవడానికి ప్రయత్నించడంతో 30 శాతం ట్యాక్స్‌ కడితేనే విత్‌ డ్రా చేసుకోవడానికి అవకాశముంటుందని సూచించారు. ట్యాక్స్‌ మినహాయించుకొని, మిగతా వాటిని తన ఖాతాకు బదిలీ చేయాలని కోరినా అలా కుదరదంటూ సెల్‌ఫోన్‌ స్వీచాఫ్‌ చేశారు. దీంతో ఇదంతా మోసమని గుర్తించిన బాధితుడు మల్కాజిగిరి సైబర్‌క్రైమ్‌ పోలీసులకు ఫిర్యాదు చేశాడు.