Cardiac Arrest | మేడ్చల్ : ఆ మొన్న జిమ్లో వర్కవుట్ చేస్తూ కానిస్టేబుల్, మొన్న డ్యాన్స్ చేస్తూ మరో యువకుడు, నిన్న బ్యాడ్మింటన్ ఆడుతూ మరో ప్లేయర్ గుండెపోటుకు గురై ప్రాణాలు విడిచారు. తాజాగా మరో యువకుడు కాలేజీ కారిడార్లో నడుకుంటూ వెళ్తుండగా ఒక్కసారిగా కుప్పకూలిపోయాడు. ఈ ఘటన మేడ్చల్ పోలీసు స్టేషన్ పరిధిలోని కండ్లకోయలోని సీఎంఆర్ ఇంజినీరింగ్ కాలేజీలో శుక్రవారం చోటు చేసుకుంది.
రాజస్థాన్కు చెందిన సచిన్(18) అనే విద్యార్థి తన తల్లిదండ్రులతో కలిసి కుత్బుల్లాపూర్ మండలం సుచిత్ర ప్రాంతంలో నివాసం ఉంటున్నాడు. సీఎంఆర్ ఇంజినీరింగ్ కళాశాలో బీటెక్ ప్రథమ సంవత్సరం చదువుతున్నాడు. శుక్రవారం ఉదయం కళాశాలకు వెళ్లిన సచిన్ మధ్యాహ్నం 3 గంటల సమయంలో కారిడార్లో నడుచుకుంటూ వెళ్తున్న సమయంలో గుండెపొటుకు గురై ఒక్కసారిగా కుప్పకూలిపోయాడు. తోటి విద్యార్థుల సమాచారంతో యాజమాన్యం అతడిని హుటాహుటినా పక్కనే ఉన్న సీఎంఆర్ హాస్పిటల్కు తరలించారు. హాస్పిటల్లో వైద్యులు సీపీఆర్ చేశారు. అయినా ఫలితం లేకుండా పోయింది. అప్పటికే మృతి చెందినట్టు వైద్యులు నిర్ధారించారు.