సెల్‌ఫోన్‌ డ్రైవింగ్‌.. వద్దు గురూ..!

• నిబంధనలు మనకోసమే అయినా.. గాలికొదిలేస్తున్న వైనం
• ఆడియో, వీడియో కాల్‌ మాట్లాడుతూ డ్రైవింగ్‌
• తనతో పాటు.. పక్కవారికి ప్రమాదమే
• రోజురోజుకూ పెరిగిపోతున్న కేసులు
• చలాన్‌ విధించినా.. మారని వాహనదారులు
• ఇప్పటికైనా మారుదాం.. ప్రాణాలు నిలుపుకుందాం..!

సిటీబ్యూరో, జూలై 9 (నమస్తే తెలంగాణ): “వేగం కన్నా ప్రాణం మిన్నా..” “సెల్‌ ఫోన్‌ మాట్లాడుతూ వాహనం నడపడం ప్రమాదకరం.. చట్టరీత్యా నేరం” అని ప్రతి వాహనం వెనుక రాసి ఉండటం చూస్తూనే ఉంటాం. దీన్ని ప్రతి వాహన దారుడు నిత్యం చదువుతూనే ఉన్నప్పటికీ.. ఏ ఒక్కరూ పాటించడం లేదు. రయ్యుమని దూసుకు పోతూనే.. ఫోన్‌లో లీనమై పోతున్నారు. ముందూ.. వెనుక.. గమనించకుండా.. ఇష్టారాజ్యంగా డ్రైవింగ్‌ చేస్తూ ప్రమాదాన్ని కొని తెచ్చుకుంటున్నారు. ఆటోలు, కార్లు, లారీలు, తదితర డ్రైవర్లు సైతం వీడియో కాల్స్‌లో లీనమై ప్రమాదాల బారిన పడుతున్నారు. వీరితో పాటు ఇతరులను సైతం ప్రమాదంలోకి నెట్టేస్తున్నారు. ఇలాంటి వారి పట్ల పోలీసులు కఠినంగా వ్యవహరిస్తూ.. చలాన్‌ విధిస్తున్నప్పటికీ మార్పు రావడం లేదు. దీంతో అతివేగం, నిర్లక్ష్యం డ్రైవింగ్‌ తరువాత సెల్‌ఫోన్‌ డ్రైవింగ్‌ చేస్తూ ప్రమాదాల బారిన పడుతున్న వారి సంఖ్య రోజు రోజుకూ పెరుగుతున్నది.

పెరిగిపోతున్న చలానాలు

సెల్‌ఫోన్‌ డ్రైవింగ్‌ అనేది చాలా ప్రమాదకరమైంది. దీనిపై పోలీసులు అవగాహన కల్పిస్తున్నప్పటికీ మార్పు రావడం లేదు. దీంతో ఎక్కువగా సెల్‌ఫోన్‌ డ్రైవింగ్‌ చలానాలు నమోదవుతున్నాయి. అయితే పోలీసులు చలాన్‌ విధిస్తారని సెల్‌ ఫోన్‌ డ్రైవింగ్‌ మానేయడం కాదు.. సెల్‌ ఫోన్‌ మాట్లాడుతూ డ్రైవింగ్‌ చేస్తే.. ప్రమాదాల బారిన పడుతాం.. తన కోసం ఇంట్లోవారు ఎదురుచూస్తుంటారనే విషయాన్ని గుర్తుచేసుకొని సెల్‌ఫోన్‌ డ్రైవింగ్‌ను తనకుతానుగా నిషేధించుకోవాలి.