లూడో గేమ్‌లో పరిచయం…

లూడో ఆన్‌లైన్‌ గేమ్‌లో పరిచయం.. ఉద్యోగం కోసం అంటూ నగరానికి వచ్చి ప్రియుడితో సహజీవనం.. భారీగా ఉన్న అప్పులు తీర్చేందుకు అతడితో కలిసి చైన్‌ స్నాచింగ్‌.. జూబ్లీహిల్స్‌లో సీఎం రేవంత్‌రెడ్డి నివాసానికి కూతవేటు దూరంలో చైన్‌ స్నాచింగ్‌ ఘటనలో మహిళతో పాటు ఆమె ప్రియుడిని పోలీసులు అరెస్ట్‌ చేసి గురువారం రిమాండ్‌కు తరలించారు. ఏపీలోని కాకినాడకు చెందిన చేసెట్టి రేవతి(33) అనే మహిళకు పెళ్లయి ఇద్దరు పిల్లలున్నారు.

• నాలుగు నెలలుగా సహజీవనం
• అప్పులు తీర్చేందుకు లవర్‌తో కలిసి స్నాచింగ్‌
• జూబ్లీహిల్స్‌ చైన్‌ స్నాచింగ్‌ కేసులో నిందితులకు రిమాండ్‌

జారాహిల్స్‌,ఫిబ్రవరి 19: లూడో ఆన్‌లైన్‌ గేమ్‌లో పరిచయం.. ఉద్యోగం కోసం అంటూ నగరానికి వచ్చి ప్రియుడితో సహజీవనం.. భారీగా ఉన్న అప్పులు తీర్చేందుకు అతడితో కలిసి చైన్‌ స్నాచింగ్‌.. జూబ్లీహిల్స్‌లో సీఎం రేవంత్‌రెడ్డి నివాసానికి కూతవేటు దూరంలో చైన్‌ స్నాచింగ్‌ ఘటనలో మహిళతో పాటు ఆమె ప్రియుడిని పోలీసులు అరెస్ట్‌ చేసి గురువారం రిమాండ్‌కు తరలించారు. ఏపీలోని కాకినాడకు చెందిన చేసెట్టి రేవతి(33) అనే మహిళకు పెళ్లయి ఇద్దరు పిల్లలున్నారు.

ఏడాది క్రితం భర్తతో విబేధాలు రావడంతో విడాకులు తీసుకుని పిల్లలను తల్లిదండ్రులవద్ద ఉంచి ఉద్యోగం చేస్తానంటూ నగరానికి వచ్చి సనత్‌నగర్‌లో ఉంటోంది. లూడో గేమ్‌తో పాటు ఆన్‌లైన్‌ గేమ్స్‌ అడే అలవాటు కలిగిన రేవతికి ఆన్‌లైన్‌లో గుంటూరు జిల్లాకు చెందిన గద్దల నరేంద్ర అలియాస్‌ నాని(23) అనే యువకుడితో పరిచయం ఏర్పడింది. వీరిద్దరూ చాటింగ్స్‌ ద్వారా దగ్గరయి సనత్‌నగర్‌లో గది అద్దెకు తీసుకుని 4నెలలుగా సహజీవనం చేస్తున్నారు. అప్పటికే పెద్ద ఎత్తున అప్పులు చేసిన రేవతి వాటిని తీర్చేందుకు ప్రియుడితో కలిసి గత కొన్నిరోజులుగా ప్లానింగ్‌ చేస్తోంది. ర్యాపిడో డెలివరీ కోసం ఇద్దరూ కలిసి అప్పుడప్పుడు బయటకు వెళ్తుంటారు.

ఈ క్రమంలో మంగళవారం ఉదయం మాదాపూర్‌ ప్రాంతంలో డెలివరీ కోసం వెళ్లిన రేవతి, నరేంద్ర జూబ్లీహిల్స్‌ రోడ్‌ నెంబర్‌ 44లో టీ స్టాల్‌ వద్ద వేచి ఉన్నారు. అదే సమయంలో రోడ్డుమీద నడుచుకుంటూ వెళ్తున్న మానస అనే సాఫ్ట్‌వేర్‌ ఇంజనీర్‌ మెడలో గొలుసును గమనించి ఆమెను కొంతదూరం వెంబడించి అదును చూసి స్నాచింగ్‌ చేశారు. బాధితురాలి ఫిర్యాదుతో రంగంలో దిగిన జూబ్లీహిల్స్‌ పోలీసులు ఏపీ సరిహద్దు దాటి వెళ్లేందుకు ప్రయత్నిస్తున్న నిందితులు రేవతి, నరేంద్రను అరెస్ట్‌ చేసి వారివద్దనుంచి 10గ్రాముల బంగారు గొలుసును, స్నాచింగ్‌కు ఉపయోగించిన స్కూటీని, రెండు సెల్‌ఫోన్లను స్వాధీనం చేసుకున్నారు. నిందితులను గురువారం రిమాండ్‌కు తరలించారు.