Deltacron | యూకేలో వెలుగులోకి క‌రోనా కొత్త వేరియంట్‌.. డెల్టా, ఒమిక్రాన్ కంటే వేగంగా వ్యాప్తి

Deltacron | ఒమిక్రాన్ రూపంలో వ‌చ్చిన కొవిడ్‌-19 ఇప్పుడిప్పుడే త‌గ్గుముఖం ప‌డుతున్న‌ది. రోజువారీ కేసుల సంఖ్య గ‌ణ‌నీయంగా త‌గ్గిపోతున్నాయి. ఇక క‌రోనావైర‌స్ మామూలు ప‌రిస్థితులు వ‌స్తాయ‌ని అనుకుంటున్న త‌రుణంలో మ‌రో షాకింగ్ వార్త బ‌య‌ట‌కొచ్చింది. యూకేలో మ‌రో హైబ్రిడ్ స్ట్రెయిన్‌ వెలుగులోకి వ‌చ్చింది. డెల్టా, ఒమిక్రాన్ వేరియంట్ల క‌ల‌యిక‌తో వ‌చ్చిన ఈ కొత్త వేరియంట్ డెల్టాక్రాన్ ఇప్పుడు క‌ల‌వ‌ర‌పెడుతున్న‌ది. యూర‌ప్ దేశ‌మైన సైప్ర‌స్‌లో ఈ కొత్త స్ట్రెయిన్‌ను గుర్తించిన‌ట్లు యూకే హెల్త్ సెక్యూరిటీ ఏజెన్సీ వెల్ల‌డించింది.

వాస్త‌వానికి డెల్టాక్రాన్ వేరియంట్‌ను డిసెంబ‌ర్ చివ‌రి వారంలోనే సైప‌స్ దేశానికి చెందిన ప‌రిశోధ‌కులు గుర్తించారు. ఆ స‌మ‌యంలో డెల్టా, ఒమిక్రాన్ ల‌క్ష‌ణాలు ఉన్న 25 కేసులు న‌మోద‌య్యాయ‌ని ప‌రిశోధ‌కులు తెలిపారు. ఆ శాంపిల్స్‌ను జ‌న‌వ‌రి 7న జ‌న్యు విశ్లేష‌ణ‌కు పంపించారు. అప్పుడు అందులో డెల్టా జ‌న్యువుల‌తో పాటు ఒమిక్రాన్ జ‌న్యువులు కూడా క‌నిపించాయి. అయితే తొలుత దీన్ని ల్యాబ్ ఎర్ర‌ర్‌గా తోసిపుచ్చారు. కానీ ఆ త‌ర్వాత ప‌రీక్ష‌ల్లో హైబ్రిడ్ స్ట్రెయిన్‌గా నిర్ధారించారు. డెల్టా, ఒమిక్రాన్ వేరియంట్ల రీకాంబినేష‌న్‌తో ఈ కొత్త వేరియంట్ డెల్టాక్రాన్ ఏర్ప‌డిన‌ట్లు స్ప‌ష్ట‌మ‌వుతోంద‌ని యూకే హెల్త్ సెక్యూరిటీ ఏజెన్సీ పేర్కొంది. డెల్టా, ఒమిక్రాన్ వేరియంట్ల జెనెటిక్ మెటీరియ‌ల్‌ను ప‌ర‌స్ప‌ర బ‌దిలీ చేసుకోవ‌డం ద్వారా ఈ వేరియంట్ ఏర్ప‌డిన‌ట్లు తెలిపింది. గ‌త వేరియంట్ల‌తో పోలిస్తే ఇది చాలా వేగంగా వ్యాప్తి చెందుతుంది. అయితే దీనిపై ఆందోళ‌న ప‌డాల్సిన అవ‌స‌రం లేద‌ని తెలిపింది. ప్ర‌స్తుతం ఉన్న వ్యాక్సిన్లు ఈ వేరియంట్‌ను అడ్డుకోగ‌ల‌ద‌ని యూకేకు చెందిన ప‌రిశోధ‌కులు చెబుతున్నారు.