తిన్నింటి వాసాలు

లెక్కవెడుతున్నరు! అగో ! తిన్న ఇంటి వాసాలు లెక్కవెట్టుడు మొదలైంది! అలసిన బాటసారి ఆకలాకలి అని అంటే ఇంటి తలుపు తీసి కాళ్లకు నీళ్లిచ్చి పిలిచి పీటేసి మంచిగ పచ్చని మోతుకాకుల మక్క గట్క పెట్టి దయాపామురంతోని అరుసుకుంటిమి! తెల్లవారి లేచి పొమ్మంటే మర్ల వడుతున్నడు

లెక్కవెడుతున్నరు!
అగో ! తిన్న ఇంటి వాసాలు
లెక్కవెట్టుడు మొదలైంది!
అలసిన బాటసారి
ఆకలాకలి అని అంటే ఇంటి తలుపు తీసి
కాళ్లకు నీళ్లిచ్చి
పిలిచి పీటేసి
మంచిగ పచ్చని మోతుకాకుల మక్క గట్క పెట్టి
దయాపామురంతోని అరుసుకుంటిమి!
తెల్లవారి లేచి పొమ్మంటే
మర్ల వడుతున్నడు

గిదే రానిచ్చుడే తప్పైంది మల్లా !
తిండి పెట్టుడు ఇంకా తప్పైంది
రాత్రంతా నిద్రవోక
బాటసారి మన ఇంటి వాసాలు లెక్కవెట్టి
బాజాప్తా ఇల్లు నాదే అంటున్నడు !

రానిచ్చుడు తప్పైంది
తిండి పెట్టుడు ఇంకా తప్పైంది

శాసనాల్లెక్క గోడలకు
తాత ముత్తాతల ఫొటోలు
వరుసగున్నాయి మొగులునించి దిగచ్చినట్టు!
లోకమంతా ఇల్లు మనదే అంటున్నడు

లల్లాయి పదాలు పడేటోల్లయి
రంగు బట్టలేసుకుని బాగోతాలు ఏసేటోల్లయి
బొమ్మలు పెట్టుకుంట షాన్‌ పోతున్నరు
చరిత్ర లేదని వంకర టింకర మాట్లాడుతున్నారు

తిన్న ఇంటి వాసాలు లెక్కవెట్టేటోళ్ల
చూపుడు వేలు ఇరిచేస్తే బుద్ధి అస్తది
ఇసంటోళను నమ్మరాదు
కట్టెవట్టుకొని కాగడాలు వట్టుకొని
కంటి మీద కునుకు లేక
గస్తీ తిరుగాలే !!
పహరా హుషార్‌!!

– కందాళై రాఘవాచార్య 8790593638