కోటి జెండాల నేల

ఇంటింటా నెత్తిమీద బోనంలా
తెలంగాణ జెండా ఎత్తుకుంది
గుండె నిండా దేశభక్తి నింపుకుని

చెట్టు పుట్టా అంతా
మూడురంగులు చుట్టుకుని
నేలనంతా స్వాతంత్య్ర పండుగను పరిచింది

ఇక్కడ
రంగులు అన్నీ కలపబడతాయి
భుజాలు బేషరతుగా అందించబడతాయి
హృదయాలు పెనవేసుకొని బతుకుతాయి

ఈ చోటు
స్వేచ్ఛ సుస్వాగతం పలుకుతుంది
అభివృద్ధి అందరి హక్కుల హక్కుగా
మనసులు ప్రగతికి హారతి పడతాయి

తెలంగాణ ఎప్పుడూ
జాతీయ భావం పులకించే క్షేత్రం
దేశ భవిష్యత్తు కోసం త్యాగానికి సదా సిద్ధం

కోటి జెండాలను ఎగరవేసి
ప్రతి మనిషిలో దేశ భక్తిని కదిలించి
మది మదిలో గాంధీ భావాల్ని నింపింది

దాసరి మోహన్‌
99853 09080