పాటలకందని వాడు– సాయిచంద్
మాటలకందని వాడు– సాయిచంద్
పాటల మూటెత్తుకొని– సాయిచంద్
పల్లెలు సుట్టొచ్చినాడు– సాయిచంద్
ఉద్యమ జెండైనాడు– సాయిచంద్
పాటకూపిరైనోడు– సాయిచంద్ (పాట)
తెలంగాణ ఉద్యమాల్లో పొలికేకై బొబ్బపెట్టి
లక్షలాది జనాలకు లక్ష్యాన్ని చూపెట్టి
బిగిపిడికిలి జెండెత్తి విప్లవ పాటలు పాడి
పాటమ్మకు హారతిచ్చి అగ్గిని రాజేసినోడు
కణకణమని డప్పుకొట్టి– సాయిచంద్
పాటయుద్ధం పుట్టించె– సాయిచంద్
లాఠీలకు ఎదురుబడి– సాయిచంద్
లావుపాటలు పాడినాడె– సాయిచంద్
ఉక్కు నరాలు బిగపట్టీ పాటకూపిరి పోసినోడు
కాలందెలు మోగించి కవాతులు తొక్కినోడు
అమరవీరుల ఆశయాలు శరబోధన చేసినోడు
మట్టికోసం మరణాన్ని పాటతో ముద్దాడినోడు
ఇంటింటికి మేలుకొలుపై– సాయిచంద్
నీ పాట సుప్రభాతమాయె– సాయిచంద్
నీ ఆటపాటలు లేకుండా– సాయిచంద్
రాష్ట్రం ఊహించలేము– సాయిచంద్ (పాట)
రామారావు నాగన్నల రాగమాలపించి
గద్దర్ గర్జనల గొంతును పలికించి
గోరటి జయరాజోలే పాటలు రచియించి
గూడంజన్నల ఊరు గోడునాలపించి
తండ్రి వెంకట్రాముల– సాయిచంద్
పాటలుగ్గుపాలు తాగి– సాయిచంద్
మిట్టపల్లి యశ్పాల్ పాటతో– సాయిచంద్
మెరుపులాగ మెరిసినాడు– సాయిచంద్ (పాట)
నీ గొంతు వినీ చెట్టుసేమ ఊగి ఆడెనే
నీ ఆట చూసి లేగదూడ సెంగునెగిరెను
నిన్నుగనీ తెలంగాణ గర్వమొందెలే
వెయేండ్లయిన నీలాంటోడు పుట్టబొడులే
నీవిడిసిన ఆశ్వాస సాయిచంద్
పూల వనాలై పూసును సాయిచంద్
నీవెత్తిన ఆ గొంతుక సాయిచంద్
కోట్ల గొంతులై గర్జించును సాయిచంద్
(పాట) యశ్పాల్
నిన్నటి దాకా పాటలతో మెరిసిన రూపం
నేడు పాటలలో వెలిగే దీపం
ఎన్నో గుండెల్ని తట్టిలేపిన ఆ పాట
ఇక జ్ఞాపకాల్ని మాత్రమే
తట్టి లేపేదిగా మారటం ఎంత దుర్భరం!
ఎంత పాడినా ఇంచుక కూడా తప్పని శృతి
ఎందుకో.. ఉన్నట్టుండి గతి మార్చింది
కఱకు కాలగతి కన్నీరు మిగిల్చింది..
అసంఖ్యాక వేదికలపై నర్తించిన ఆ పదాలు
మన మనోఫలకాలపై చెరగని దృశ్య ముద్రలు
ఘన తెలంగాణను ఏ కొంచెం తక్కువ చేసినా
తన సున్నిత హృదయంతో హార్డ్ ఎటాక్ ఇచ్చిన
ఆ గుండె ఎంతో పదునైన ఆయుధం!
బారికేడ్ల గట్లు తెగి అలుగు పారిన
ప్రజాభిమానవాహినిని
కార్డ్లెస్ మైక్తో నియంత్రించిన ఆ గొంతు
ఎంతో పదపేన్న హృదయం..
పదం వెనుక పదం కురిసిన జానపద పాట
కదం వెనుక కదం కలిపిన మన పల్లెల ఆట
నేడు ఒక కలగా మిగిలింది
ఒక కళగా మెరిసింది
సోలో ఆర్కెస్ట్రాగా ప్రతిధ్వనించడం తప్ప
లయ తప్పటం తెలియని ఆ పాటపై అసూయనో ఏమో!
ఆ గుండె లయ తప్పింది
ఎదుటి గుండెల్ని బరువెక్కించింది..
నిన్నటి దాకా అతనో పాటల పూల వాన
నేడు ఆ పాటపై అభిమానుల పూల వాన..
మొన్న పిడికిలెత్తి సై అన్న ఉద్యమ వేదికల ఊపు
నిన్న చెయ్యెత్తి జై అన్న ఉత్సవ వాటికల రూపు..
మన సాయిచంద్ పాట
ఒక ఆకలి కేక
ఒక ఆవేశపు శంఖానాదం
ఒక అర్థవంతమైన ఆవేదన
ఒక ఆలోచనాత్మక అభ్యర్థన..
ఒక మార్పును కాంక్షించే హెచ్చరిక
ఒక అమర గీతమైన అంజలి
ఒక ఆత్మ విశ్వాస ప్రాంజలి
ఒక చైతన్య నినాదం
ఒక స్పందనాత్మక కళా సంవిధానం
ఒక ఉద్వేగపూరిత ఉచ్ఛ్వాస
నైరాశ్యాన్ని పారద్రోలే నిశ్వాస
తమ్ముడు సాయిచంద్..
మొన్నైనా.. నిన్నైనా.. రేపైనా..
రాష్ట్రమంతా మోగిన పాట..
తెలంగాణా తియ్యందనంతో మాగిన మాట
ఇప్పుడు హఠాత్తుగా ఆగిపోయిన పాట…
– మడిపల్లి దక్షిణామూర్తి
రాతి బొమ్మకు రాగం కట్టినవాడా
రాక్షస నీతిని స్వర ఖడ్గంతో ఛేదించినవాడా
భావోద్వేగ బంధాన్ని తట్టిలేపినవాడా
దశబంధ చెరువులను
ఒక్క గొంతులో ఒంపుకున్నవాడా
నిద్రాణ నిశీధిలో నిప్పుకణమై
మెరిసిన వాడా ఇలా ఎన్నని ఎన్నెన్ని
సందర్భాలను గుర్తు చేసుకునేది సాయీ..
తెలంగాణ సమరాంగణమున
ఎన్ని దుఃఖాలను
ఆలపించావని లెక్కించగలం..
ఎన్ని సభల్లో నీ సమ్మోహన గానం
పిడికిల్లెత్తించిందని చూడగలం
ఇంటి నుంచి అరుణారుణ గానాలను వింటూ
గులాబీ వనంలో
పరిమళించిన గొంతుకగా
పరవళ్ళు తొక్కించిన నీ గానం
వినని చెవ్వు లేదు ఈ గడ్డ మీద
నీ పాటకు పిడికిలెత్తని చేయి లేదు తెలంగాణల
వెలుగుతున్న తెలంగాణలో
ఎగిరే నీ స్వరజెండా
ఇప్పుడప్పుడే ఆగిపోతుందని
కలలోనైనా అనుకోలేదు
రాతి గుండెలను
కరిగించిన నీగానం
తరలెల్లి పోతదని తలచలేదు సాయీ..
ధిక్కార నేలపై దివిటీగానమై
ప్రజ్వరిల్లిన నీ స్వరం
తెలంగాణ నేల మీద
ప్రవాహ సదృశ్యమై
పారాడుతూనే ఉంటుంది.
నూర శ్రీనివాస్: 91827 77011
(సాయి చంద్ అకాల మృతికి నివాళిగా)
తెలంగాణ
ధూం ధాం గొంతుక
ప్రభుత పనుల
పాటల వేదిక
చైతన్య భావుకతల
స్వర పేటిక
గేయాల ధ్వనిని
తెలియ జేసిన జీవిక
కానరాని లోకాలకు
కదిలి పోయింది!
సాయిచందు
ప్రభుతజీవనాడి
తంత్రులను
ప్రజలముందు
ఆటపాటలతో
ఓలలాడించే
జనులగొంతుక
మూగవోయింది..
యావత్ తెలంగాణ
ప్రజల ప్రాణనాడి
చేష్టలుడిగింది!
స్వర్గాధిపతికి
తెలంగాణ ప్రగతి
పాటల మాంత్రికుడు
తన ప్రభుతలో
ఉండాలనుకుని
దివికి తీసుకెళ్లాడేమో
నీవు లేని
నీ పాటలు
మా చెవుల్లో
ప్రతిధ్వనించిన
నీవు లేని లోటు
కన్నీటిపాటగానే
మాకు మిగిలిపోతుంది!
అమరగాయకోత్తమా!
జోహార్లు!!
సాయిచంద్
గాయకోత్తమా!
నీకిదే
మా కన్నీటి వీడ్కోలు…!!!
డాక్టర్ గన్నోజు శ్రీనివాసాచార్య: 85558 99493
కష్టాల్ని పాటలుగా కట్టి
తెలంగాణ కన్నీటి సెమటను
పాటల చెలిమెలుగా
మలిచిన గొంతు!
చెప్పాల్సింది పాటతో చెప్పాడు
చేరాల్సిన చోటికి
పాట ద్వారా చేరాడు.
సభల ముందు పాట
కోటి గొంతుల ఆటపాట
ఆ పాటలేని సభలేదు
ఆ పాట దుమ్ము రేగకుండా
ఏ పథకం పొద్దు పొడవదు.
ఇప్ప కొమ్మల్లో పాట
దోపిడిపై తూటా పాట.
ఊపిరులూదిన పాట
స్ఫూర్తి నింపిన పాట.
బతుకును శకలాలు శకలాలుగా
పాడిన పాట
తుడుం మోతకు డోలు దెబ్బకు
డప్పుల దరువుకు
తెలంగాణ ధూం ధాం కు
కోరసైన పాట.
చెరువు నీటి గలగలలైన పాట
జనం గుండెల్లో డప్పుల మోత.
కూడు లేని పేదోళ్లకు ఆసరా
పాట సరదా కోసం కాదు
మార్పు కోసమని నమ్మిక.
తెలంగాణ పల్లె
గుండెల్లో నాదమైన పాట
ఇప్పుడు ఆ పాట మూగబోయింది.
ఇప్పుడు బతుకును
పాటగా మలిచేదెవరు?
గాలి అలల సంగీతంగా మారిన
ఆ పాట వింటాను
స్ఫూర్తి పొందుతాను.
గుడిపల్లి నిరంజన్: 94933 19878