Parveta Utsavam | తిరుమలలో ఘనంగా శ్రీమలయప్పస్వామివారి పార్వేట ఉత్సవం

Parveta Utsavam | తిరుమల శ్రీవారి నవరాత్రి బ్రహ్మోత్సవాల మరుసటిరోజు నిర్వహించే సంప్రదాయ పార్వేట ఉత్సవం బుధవారం ఘనంగా జరిగింది.

తిరుమల : తిరుమల శ్రీవారి నవరాత్రి బ్రహ్మోత్సవాల ( Navaratri Brahmotsavams ) మరుసటిరోజు నిర్వహించే సంప్రదాయ పార్వేట ఉత్సవం ( Parvetai Utsavam ) బుధవారం ఘనంగా జరిగింది. సాధారణంగా మకర సంక్రాంతి మరుసటిరోజైన కనుమ పండుగనాడు నిర్వహించే ఈ ఉత్సవాన్ని, అధికమాసం కారణంగా నిర్వహించిన నవరాత్రి బ్రహ్మోత్సవాల అనంతరం కూడా నిర్వహించడం ఆనవాయితీగా వస్తుంది.

తిరుమలలో ఉదయం నుంచి భారీ వర్షం కురుస్తుండటంతో, శ్రీవారికి ప్రాతఃకాల ఆరాధన పూర్తయిన అనంతరం శ్రీమలయప్పస్వామివారిని తిరుచ్చిపై ఊరేగింపుగా వైభవోత్సవ మండపానికి తీసుకొచ్చారు. స్వామివారికి ఆరాధన, నివేదన, హారతి సమర్పించారు. పార్వేట ఉత్సవంలో భాగంగా శ్రీమలయప్పస్వామివారి తరఫున అర్చకులు బాణం సంధించి కొంతదూరం ముందుకు వెళ్లి తిరిగి వెనక్కి వచ్చారు. ఈ ప్రక్రియను మూడుసార్లు నిర్వహించారు. దుష్టశక్తులను శిక్షించి, భక్తులను రక్షించడమే పార్వేట ఉత్సవంలోని అంతరార్థమని అర్చకులు వెల్లడించారు.