Visit:
TFCC | టాలీవుడ్‌లో సినిమా షూటింగ్‌లు ఆపివేయాల‌ని తెలుగు ఫిల్మ్ ఛాంబర్ ఆఫ్ కామర్స్ (TFCC) కీలక నిర్ణయం తీసుకుంది. ప్ర‌స్తుతం జ‌రుగుతున్న సినిమా షూటింగ్‌లను ఎక్క‌డికక్క‌డ నిలిపివేయాలని నిర్మాతలకు ఆదేశాలు జారీ చేసింది. సినిమా కార్మికుల వేతనాల పెంపు వివాదంకి సంబంధించి ఇంకా చ‌ర్చ‌లు జ‌రుగుతున్న విష‌యం తెలిసిందే. అయితే చ‌ర్చ‌లు ఇంకా కొలిక్కి రాక‌పోవ‌డంతో నిర్మాత‌ల‌ను షూటింగ్‌లు ఆపివేయాలంటూ ఛాంబర్ పిలుపునిచ్చింది. తదుపరి సూచనలు ఇచ్చే వరకూ ఎలాంటి చిత్రీకరణలు చేయొద్దని నిర్మాతలకు కఠిన ఆదేశాలు జారీ చేసింది. అలాగే ఫిల్మ్ ఫెడరేషన్ యూనియన్లతో ఎవరూ సంప్రదింపులు చేయొద్దని తెలిపింది.
తెలుగు ఫిల్మ్ ఇండస్ట్రీ ఎంప్లాయీస్ ఫెడరేషన్, కార్మికుల వేతనాలను 30% పెంచాలని డిమాండ్ చేస్తూ ఆగస్టు 4, 2025 నుంచి సమ్మెకు పిలుపునిచ్చిన విష‌యం తెలిసిందే. ఈ డిమాండ్‌ను నిర్మాతల సంఘం అంగీకరించకపోవడంతో, షూటింగ్‌లను నిలిపివేయాలని కార్మికులు నిర్ణయించారు. అయితే దీనిపై స్పందించిన తెలుగు ఫిల్మ్ ఛాంబర్, ఫెడరేషన్ ఏకపక్షంగా తీసుకున్న ఈ నిర్ణయాన్ని ఖండించింది. చిన్న నిర్మాతలు ఈ వేతన పెంపును భరించలేరని, ఇది పరిశ్రమకు మరింత నష్టం కలిగిస్తుందని ఛాంబర్ అభిప్రాయపడింది. ప్ర‌స్తుతం దీనికి సంబంధించిన చ‌ర్చ‌లు ఇంకా జ‌రుగుతునే ఉన్నాయి.
