గాయపడ్డ వ్యక్తి జీవిత కథ

అగ్ర కథానాయకుడు దేవరకొండ విజయ్‌ హీరోగా రూపొందుతున్న యాక్షన్‌ డ్రామా ‘రౌడీ జనార్దన’.

అగ్ర కథానాయకుడు దేవరకొండ విజయ్‌ హీరోగా రూపొందుతున్న యాక్షన్‌ డ్రామా ‘రౌడీ జనార్దన’. గోదావరి తీరంలోని కళింగపట్టణం గ్రామ నేపథ్యంలో సాగే ఈ రస్టిక్‌ యాక్షన్‌ థ్రిల్లర్‌కి రవికిరణ్‌ కోలా దర్శకుడు. దిల్‌రాజు నిర్మాత. నిర్మాణం తుదిదశకు చేరుకున్న ఈచిత్రం డిసెంబర్‌లో విడుదల కానున్నది. రెండు భాగాలుగా సినిమాను విడుదల చేయాలనే ఆలోచనలో మేకర్లు ఉన్నట్టు వార్తలు కూడా వస్తున్నాయి. ఇటీవలే మంగళూరులో ఈ సినిమాకు సంబంధించిన కీలక సన్నివేశాలను పూర్తిచేశారు.

ప్రస్తుతం హైదరాబాద్‌ అల్యూమినియం ఫ్యాక్టరీలో ఈసినిమా కోసం ఓ భారీసెట్‌ని నిర్మిస్తున్నారు. ఈ సెట్‌లో ద్వితీయార్ధంలో వచ్చే ఫ్లాష్‌బ్యాక్‌ ఎపిసోడ్‌ని షూట్‌ చేస్తారట. ఇది ఓ గాయపడ్డ వ్యక్తి జీవిత చరిత్ర అని, ధైర్యసాహసాలతో, తెగింపుతో ఓ సామ్రాజ్యాన్ని నిర్మించుకున్న జనార్దన అనే రౌడీ కథను ఈ సినిమాలో చూపించనున్నారని, అధికార పోరాటాల చుట్టూ నడిచే కథ ఇదని మేకర్స్‌ తెలిపారు. సీనియర్‌ హీరో రాజశేఖర్‌ ఇందులో కీలక పాత్ర పోషిస్తున్న విషయం తెలిసిందే. ఆయన పాత్ర, లుక్‌ మునుపెన్నడూ చూడని రీతిలో ఉంటుందట. గ్రామీణ నేపథ్యంలో సాగే ఈ రూటెడ్‌ యాక్షన్‌ డ్రామాలో విజయ్‌కు జోడీగా కీర్తి సురేశ్‌ నటిస్తున్నది.