Visit:
Ravali | తెలుగు సినీప్రియులకు రవళి పేరు చెప్పగానే గుర్తొచ్చేది ఆమె అందం, సహజ నటన, ఆకట్టుకునే చిరునవ్వు. దాదాపు రెండు దశాబ్దాలపాటు తెలుగు తెరపై మెరిసిన ఈ నటి స్టార్ హీరోలతో కలసి అనేక సూపర్ హిట్ చిత్రాల్లో నటించి అభిమానుల మనసుల్లో నిలిచిపోయింది. 1990లో మలయాళ సినిమా ‘జడ్జిమెంట్’ ద్వారా సినీ రంగంలోకి అడుగుపెట్టిన రవళి, తదుపరి ఏడాది ‘జయభేరి’ చిత్రంతో టాలీవుడ్‌లోకి ఎంట్రీ ఇచ్చింది. కెరీర్ ప్రారంభంలో పెద్దగా అవకాశాలు రాకపోయినా, ‘పెళ్లి సందడి’ సినిమాతో రవళి ఒక్కసారిగా స్టార్ హీరోయిన్‌గా మారింది. ఆ తర్వాత ‘ఒరేయ్ రిక్షా’, ‘వినోదం’, ‘చిన్నబ్బాయి’, ‘ముద్దుల మొగుడు’, ‘శుభాకాంక్షలు’ వంటి చిత్రాల్లో నటించి ప్రేక్షకులను మెప్పించింది.
తర్వాత కాలక్రమేణా ప్రధాన పాత్రల అవకాశాలు తగ్గడంతో రవళి క్యారెక్టర్ ఆర్టిస్టుగా కూడా పలు చిత్రాల్లో నటించింది. 2007లో ఆమె నీలికృష్ణను వివాహం చేసుకుంది. ఈ దంపతులకు ఇద్దరు కుమార్తెలు ఉన్నారు. రవళి సోదరి హరిత కూడా నటి కావడం విశేషం; ఆమె అనేక తెలుగు టీవీ సీరియల్స్‌లో నటించింది. తెలుగులో వెంకటేశ్, బాలకృష్ణ వంటి స్టార్ హీరోలతో పాటు, మలయాళంలో మోహన్‌లాల్‌తో కూడా రవళి నటించింది. చివరిసారిగా 2011లో ‘మాయగాడు’ చిత్రంలో కనిపించిన ఆమె, ఆ తర్వాత సినిమాలకు దూరమైంది. ప్రస్తుతం కుటుంబ జీవితంలో మమేకమై సంతోషంగా గడుపుతోంది. ఇటీవల రవళి, హీరోయిన్ రోజాతో కలిసి దీపావళి వేడుకల్లో పాల్గొని మీడియాలో మళ్లీ దర్శనమిచ్చింది.
రీసెంట్‌గా రవళి కొన్ని ఫొటోలు సోష‌ల్ మీడియాలో వైర‌ల్ అవుతుండ‌గా, వాటిని చూసి అభిమానులు అవాక్క‌వుతున్నారు. ఎంత అందంగా ఉండే రవళి ఇలా మారిపోయిందేంటి అని కామెంట్స్ చేస్తున్నారు. స్వతహాగా తెలుగమ్మాయి అయిన రవళి, కేవలం 18 ఏళ్ల వయసులోనే ఇండస్ట్రీలో అడుగుపెట్టి, 20 ఏళ్లు ప్రేక్షకులను అలరించింది. ఆమె అందం, అభినయం, సౌమ్యమైన వ్యక్తిత్వం ఈరోజు కూడా అభిమానులను ఆకట్టుకుంటూనే ఉన్నాయి.
