Visit:
Irumudi | మాస్ మహారాజా రవితేజ హీరోగా, దర్శకుడు శివ నిర్వాణ తెరకెక్కించిన ‘ఇరుముడి’ సినిమా బాక్సాఫీస్ వద్ద ఘనవిజయం సాధించడమే కాకుండా బాక్సాఫీస్ దగ్గర దూసుకుపోతోంది. ఆగస్టు 21న ప్రేక్షకుల ముందుకు వచ్చిన ఈ చిత్రానికి తొలి షో నుంచే పాజిటివ్ టాక్ రావడంతో అన్ని వర్గాల ప్రేక్షకుల నుంచి మంచి స్పందన లభిస్తోంది. చాలా కాలంగా ఓ భారీ హిట్ కోసం ఎదురుచూస్తున్న రవితేజకు ఈ సినిమా సాలిడ్ కమ్బ్యాక్ ఇచ్చిందని అభిమానులు సంబరాలు చేసుకుంటున్నారు.ముఖ్యంగా సినిమాలో తండ్రి-కూతురు మధ్య ఉన్న భావోద్వేగ బంధాన్ని దర్శకుడు శివ నిర్వాణ హృద్యంగా చూపించారనే ప్రశంసలు వస్తున్నాయి. రవితేజ తనదైన ఎనర్జీ, నటనతో మరోసారి ప్రేక్షకులను ఆకట్టుకున్నారని అభిమానులు చెబుతున్నారు. థియేటర్లలో మంచి ఆక్యుపెన్సీతో దూసుకుపోతున్న ఈ సినిమా భారీ కలెక్షన్ల దిశగా పయనిస్తోంది.
అయితే బాక్సాఫీస్ వద్ద విజయవంతంగా కొనసాగుతున్న ‘ఇరుముడి’ ఇప్పుడు ఊహించని వివాదంలో చిక్కుకుంది. సినిమాలో ఓ ఉపాధ్యాయురాలి పాత్రను, ప్రభుత్వ పాఠశాల వాతావరణాన్ని నెగెటివ్గా చూపించారంటూ ఉపాధ్యాయ సంఘాలు అభ్యంతరం వ్యక్తం చేస్తున్నాయి.సీలేరు జెడ్పీ హైస్కూల్ పేరును ప్రస్తావిస్తూ, ప్రభుత్వ పాఠశాల విద్యార్థుల యూనిఫామ్ను చూపించిన సన్నివేశాల్లో టీచర్ పాత్రను ప్రతికూలంగా చిత్రీకరించారని ఉపాధ్యాయ నేతలు ఆరోపిస్తున్నారు. ఇలాంటి సన్నివేశాలు ఉపాధ్యాయుల ప్రతిష్టకు భంగం కలిగించడంతో పాటు సమాజానికి తప్పుడు సందేశం పంపే అవకాశం ఉందని వారు ఆందోళన వ్యక్తం చేస్తున్నారు.
సినిమాలోని అభ్యంతరకర సన్నివేశాలను వెంటనే తొలగించాలని ఏపీ ఉపాధ్యాయ సమాఖ్య నేతలు చెన్నుపాటి మంజుల, బసవలింగారావు డిమాండ్ చేశారు. ఈ మేరకు వారు ఒక ప్రకటన విడుదల చేసినట్లు సమాచారం. ప్రభుత్వ పాఠశాల ఉపాధ్యాయులపై ప్రజల్లో తప్పుదారి పట్టించే అభిప్రాయం కలిగేలా కొన్ని సన్నివేశాలను రూపొందించారని వారు విమర్శించారు.‘ఇరుముడి’ ఇప్పటికే ప్రేక్షకుల ఆదరణతో విజయవంతంగా ప్రదర్శితమవుతున్న సమయంలో ఈ వివాదం తెరపైకి రావడం ఆసక్తికరంగా మారింది. ఉపాధ్యాయ సంఘాల డిమాండ్పై చిత్రబృందం ఎలా స్పందిస్తుంది? అభ్యంతరం వ్యక్తం చేస్తున్న సన్నివేశాల్లో మార్పులు చేస్తుందా? లేదా అనే అంశంపై ఇప్పుడు ఆసక్తి నెలకొంది.
