శృతి దాచిన రహస్యం

‘అనూహ్య సంఘటన కారణంగా ఓ యువతి జీవితం ఎలాంటి మలుపులు తిరిగింది? ఆ సంక్షోభం నుంచి ఆమె ఎలా బయటపడింది? ఈ క్రమంలో తెలిసిన రహస్యం ఏమిటి? ఈ ప్రశ్నలకు సమాధానాలు తెలుసుకోవాలంటే ‘మై నేమ్‌ ఈజ్‌ శృతి’ సినిమా చూడాల్సిందే’ అంటున్నారు దర్శకుడు డి.శ్రీనివాస్‌ ఓంకార్‌. ఆయన నిర్దేశకత్వంలో హన్సిక ప్రధాన పాత్రలో నటిస్తున్న చిత్రం ‘మై నేమ్‌ ఈజ్‌ శృతి’. ‘ది హిడెన్‌ ట్రూత్‌’ ఉపశీర్షిక. తొలి షెడ్యూల్‌ పూర్తయింది. ఈ నెల రెండో వారంలో మరో షెడ్యూల్‌ను ఆరంభించబోతున్నారు. దర్శకుడు మాట్లాడుతూ ‘స్క్రీన్‌ప్లే ప్రధానంగా సాగే సస్పెన్స్‌ థ్రిల్లర్‌ ఇది. హన్సిక పాత్ర చిత్రణ భిన్న పార్శాల్లో సాగుతుంది. ఆమె కెరీర్‌లోనే వైవిధ్యమైన చిత్రంగా నిలిచిపోతుంది’ అని చెప్పారు. ఈ చిత్రానికి కెమెరా: కిషోర్‌ బోయిడపు, సంగీతం: మార్క్‌ కె రాబిన్‌, నిర్మాతలు: రమ్య బురుగు, నాగేందర్‌ రాజు.