Keerthy Suresh | తెలంగాణ యాసపై పట్టు దొరికింది

“దసరా’ చిత్రం నాకు సరికొత్త అనుభూతిని అందించింది. ‘మహానటి’ తర్వాత మరో ఛాలెంజింగ్‌ రోల్‌ దొరకడం అదృష్టంగా భావిస్తున్నా’ అని చెప్పింది అగ్ర కథానాయిక కీర్తి సురేష్‌. ఆమె నాని సరసన నటించిన ‘దసరా’ చిత్రం ఈ నెల 30న పాన్‌ ఇండియా స్థాయిలో ప్రేక్షకుల ముందుకురానుంది.

“దసరా’ చిత్రం నాకు సరికొత్త అనుభూతిని అందించింది. ‘మహానటి’ తర్వాత మరో ఛాలెంజింగ్‌ రోల్‌ దొరకడం అదృష్టంగా భావిస్తున్నా’ అని చెప్పింది అగ్ర కథానాయిక కీర్తి సురేష్‌. ఆమె నాని సరసన నటించిన ‘దసరా’ చిత్రం ఈ నెల 30న పాన్‌ ఇండియా స్థాయిలో ప్రేక్షకుల ముందుకురానుంది. ఈ సందర్భంగా కీర్తి సురేష్‌ పాత్రికేయులతో ముచ్చటిస్తూ ‘ఈ సినిమాలో నేను వెన్నెల అనే పల్లెటూరి అమ్మాయిగా కనిపిస్తా. సవాలుతో కూడుకున్న పాత్ర ఇది. మేకప్‌ కోసమే కొన్ని గంటల సమయం పట్టేది. సింగరేణి బొగ్గు గనుల్లో దుమ్ము, ధూళి నడుమ షూటింగ్‌ చేశాం.

సహాయ దర్శకులు, ఓ ప్రొఫెసర్‌ సహకారంతో తెలంగాణ యాసను బాగా ప్రాక్టీస్‌ చేశా. డబ్బింగ్‌ చెప్పే సమయానికి తెలంగాణ యాసపై పూర్తి పట్టు దొరికింది. ప్రతి సినిమాకు ఓ ఫీల్‌ ఉంటుంది. ఈ సినిమా పూర్తయిన తర్వాత చాలా భావోద్వేగానికి గురయ్యా. నా కెరీర్‌లో మరో గొప్ప చిత్రంగా మిగిలిపోతుందనే భావన కలిగింది. ఈ సినిమాలో ‘ఛమ్కీల అంగీలేసి’ పాట చాలా పాపులర్‌ అయింది.

ఈ పాట విన్నప్పుడే ప్రతి పెళ్లిలో మార్మోగిపోతుందని అనుకున్నాం. తెలంగాణ జానపద గీతంలోని సొగసు ఏమిటో ఈ పాట ద్వారా నాకు తెలిసింది. లిరిక్స్‌ అర్థం తెలుసుకుంటే అద్భుతంగా అనిపించింది. బాలీవుడ్‌లో కొన్ని కథలు విన్నా. అంతగా నచ్చకపోవడంతో అంగీకరించలేదు. మంచి కథ దొరికితే హిందీలో నటిస్తా’ అని చెప్పింది.