వెన్నెల ఆకట్టుకుంటుంది

‘జీవితం పట్ల ఉన్నతమైన లక్ష్యాలున్న వెన్నెల అనే యువతిగా ‘మెరిసే మెరిసే’ సినిమాలో నా పాత్ర ప్రతి ఒక్కరినీ అలరిస్తుంది’ అని చెప్పింది శ్వేత అవస్తి. ఆమె హీరోయిన్‌గా నటించిన ఈ చిత్రానికి పవన్‌కుమార్‌ కె దర్శకత్వం వహించారు. వెంకటేష్‌ కొత్తూరి నిర్మాత. ఇటీవల ఈ చిత్రం ప్రేక్షకుల ముందుకొచ్చింది. ఈ సందర్భంగా శ్వేత అవస్తి మాట్లాడుతూ ‘ఇందులో అభినయానికి ఆస్కారమున్న పాత్రను పోషించాను. ఆధునిక యువత మనస్తత్వాలను ప్రతిబింబిస్తూ దర్శకుడు నా పాత్రను వినూత్నంగా తీర్చిదిద్దారు. నా రియల్‌లైఫ్‌కు దగ్గరగా ఉంటుంది. తెలుగులో నేను నటించిన రెండో సినిమా ఇది. తెలుగు భాష విషయంలో హీరో దినేష్‌ తేజ్‌ చక్కటి సహకారం అందించారు. నటనకు ప్రాముఖ్యమున్న పాత్రలతో మంచి నటిగా పేరుతెచ్చుకోవాలన్నది నా అభిమతం. ‘మహానటి’ సినిమాలో కీర్తిసురేష్‌ చేసిన పాత్ర నాకు ఎంతో ఇష్టం. అలాంటి క్యారెక్టర్స్‌ కోసం ఎదురుచూస్తున్నాను. ప్రస్తుతం ఓ పాన్‌ ఇండియన్‌ సినిమాలో నటిస్తున్నా’ అని తెలిపింది.