Narne Nithiin | ప్రముఖ నటుడు నితిన్ నార్ణే భుజం సర్జరీ విజయవంతం.. ఆసుపత్రి వైద్యుల వెల్లడి!

Narne Nithiin | ప్రముఖ టాలీవుడ్ నటుడు నితిన్ నార్ణే భుజం శస్త్రచికిత్స విజయవంతంగా ముగిసింది. ఇటీవల సినిమా షూటింగ్‌లో భాగంగా కుడి భుజానికి గాయమవడంతో నవంబర్ 4న ఆయన హైదరాబాద్‌లోని కిమ్స్ (KIMS) ఆసుపత్రిలో చేరారు.

ప్రముఖ టాలీవుడ్ నటుడు నితిన్ నార్ణే భుజం శస్త్రచికిత్స విజయవంతంగా ముగిసింది. ఇటీవల సినిమా షూటింగ్‌లో భాగంగా కుడి భుజానికి గాయమవడంతో నవంబర్ 4న ఆయన హైదరాబాద్‌లోని కిమ్స్ (KIMS) ఆసుపత్రిలో చేరారు. ఈ నేపథ్యంలో నవంబర్ 5 ఉదయం ప్రముఖ ఆర్థోపెడిక్ సర్జన్ డాక్టర్ ఆర్.ఎ. పూర్ణచంద్ర తేజస్వి నేతృత్వంలోని వైద్య బృందం, డాక్టర్ ఈశ్వర్ పటేల్, డాక్టర్ హరికృష్ణ బచ్చు, డాక్టర్ మధుసూదన్ సహకారంతో నితిన్ నార్ణేకు విజయవంతంగా సర్జరీ నిర్వహించారు.

ప్రస్తుతం ఆయన ఆరోగ్య పరిస్థితి నిలకడగా ఉందని, ఆపరేషన్ తర్వాత ఆయన వేగంగా కోలుకుంటున్నట్లు కిమ్స్ ఆసుపత్రి వర్గాలు అధికారికంగా వెల్లడించాయి. శస్త్రచికిత్స అనంతరం వైద్యుల పర్యవేక్షణలో నితిన్ నార్ణేకు కొద్దిరోజుల పాటు పూర్తి విశ్రాంతి మరియు ప్రత్యేక పునరావాస (rehabilitation) చికిత్స అవసరమని వైద్యులు సూచించారు. ఈ ఆరోగ్య సమాచారంపై ఎలాంటి వదంతులు నమ్మవద్దని, ఈ రికవరీ సమయంలో కుటుంబ సభ్యుల గోప్యతను గౌరవించి అభిమానులు ఎవరూ ఆసుపత్రికి రావొద్దని కిమ్స్ ఆసుపత్రి వర్గాలు మరియు కుటుంబ సభ్యులు విజ్ఞప్తి చేశారు.