Tiago EV | భారత మార్కెట్లోకి టాటా టియాగో ఎలక్ట్రిక్‌ కారు.. తక్కువ ధరతో లాంచ్‌

Tiago EV | దేశీయ కార్ల తయారీ సంస్థ టాటా మోటార్స్ తమ కొత్త ఎలక్ట్రిక్ కారు టియాగో ఈవీని లాంచ్‌ చేసింది. మొదటి 10,000 యూనిట్లకు మాత్రమే ఈ ధరలు చెల్లుబాటు అవుతాయని టాటా సంస్థ ప్రకటించింది. వీటిలో 2,000 యూనిట్లు...

Tiago EV | దేశీయ కార్ల తయారీ సంస్థ టాటా మోటార్స్ తమ కొత్త ఎలక్ట్రిక్ కారు టియాగో ఈవీని లాంచ్‌ చేసింది. దీని ప్రారంభ ధర రూ. 8.49 లక్షలు (ఎక్స్‌షోరూం ధర) గా ఉండనున్నది. మొదటి 10,000 యూనిట్లకు మాత్రమే ఈ ధరలు చెల్లుబాటు అవుతాయని టాటా సంస్థ ప్రకటించింది. వీటిలో 2,000 యూనిట్లు ప్రస్తుతం ఉన్న టాటా ఈవీ యజమానులకు అందుబాటులో ఉంచినట్లు తెలిపింది. వచ్చే నెల 10 నుంచి బుకింగ్‌ ప్రారంభం కానున్నది.

టాటా మోటార్‌ ఎలక్ట్రిక్‌ వెహికిల్స్‌ విభాగంలో తన పాపులర్‌ హ్యాచ్‌బ్యాక్‌ కారు టియాగో ఈవీని ఆవిష్కరించింది. దేశీయ ఎలక్ట్రిక్‌ వెహికిల్స్‌ మార్కెట్‌లో ఇదే తొలి ప్రీమియం హ్యాచ్‌బ్యాక్‌ ఈవీ కారు కావడం గమనార్హం. వచ్చే ఏడాది జనవరి నుంచి డెలివరీ ఇవ్వనున్నారు. ఇందుకోసం అక్టోబర్ 10 న టియాగో ఈవీ కార్ల బుకింగ్‌లను టాటా సంస్థ తెరువనున్నది. ఇప్పటికే నెక్సాన్‌ ఈవీ, టైగోర్‌ ఈవీ, నెక్సాన్‌ ఈవీ మాక్స్‌, నెక్సాన్‌ ఈవీ ప్రైమ్‌ మోడల్‌ కార్లతో టాటా మోటార్స్‌ తనకంటూ ప్రత్యేకంగా ఫ్యాన్స్‌ బేస్‌ ఏర్పాటు చేసుకున్నది. టియాగో ఈవీ ప్రస్తుతం మన దేశంలో విక్రయిస్తున్న అత్యంత చవకైన ఎలక్ట్రిక్ కారుగా గుర్తింపు పొందినది.

ప్రస్తుతం ఏడు రకాల ఈవీ వేరియంట్లు అందుబాటులో ఉన్నాయని టాటా మోటార్స్‌ సంస్థ తెలిపింది. టియాగో ఈవీని రెండు బ్యాటరీల ప్యాక్‌లతో అందుబాటులోకి తీసుకొచ్చారు. ప్రస్తుతానికి టియాగో ఈవీకి మార్కెట్లో ఇతర సంస్థల నుంచి ఎలాంటి పోటీ కనిపించడం లేదు. టాటా మోటార్స్ టైగోర్ ఈవీతోనే ప‌రోక్షంగా త‌లప‌డనున్నది. డిజైన్ పరంగా చూస్తే గత మోడల్స్‌లో కొన్ని మెరుగులు చేసినట్లు తెలుస్తున్నది. ముందువైపు గ్రిల్ సవరించారు. గ్రిల్‌పై ఈవీ బ్యాడ్జ్ ఉంచారు. గ్రిల్ కింద ఉన్న ట్రిమ్ హైలైట్ ఇప్పుడు నీలం రంగులో ఉన్నది. అలాగే, ఫ్రంట్ బంపర్ సెంట్రల్ ఎయిర్-వెంట్ కోసం ట్రై-బాణం నమూనాను ఇచ్చారు.