రూ.10 లక్షల కోట్లు ఫట్‌.. సెన్సెక్స్‌ 1,045, నిఫ్టీ 371 పాయింట్లు డౌన్‌

దేశీయ స్టాక్‌ మార్కెట్లు గురువారం తీవ్ర అమ్మకాల ఒత్తిడికి లోనయ్యాయి. దేశ, విదేశాల్లో సెంట్రల్‌ బ్యాంకుల కఠిన ద్రవ్య విధానాలు, పెరుగుతున్న ముడి చమురు ధరల నేపథ్యంలో మదుపర్లు లాభాల స్వీకరణకు పెద్దపీట వేశారు. దీంతో ఈ ఒక్కరోజే మార్కెట్‌ విలువ లక్షల కోట్ల రూపాయల్లో కరిగిపోయింది.

ముంబై, అక్టోబర్‌ 8 : దేశీయ స్టాక్‌ మార్కెట్లు గురువారం తీవ్ర అమ్మకాల ఒత్తిడికి లోనయ్యాయి. దేశ, విదేశాల్లో సెంట్రల్‌ బ్యాంకుల కఠిన ద్రవ్య విధానాలు, పెరుగుతున్న ముడి చమురు ధరల నేపథ్యంలో మదుపర్లు లాభాల స్వీకరణకు పెద్దపీట వేశారు. దీంతో ఈ ఒక్కరోజే మార్కెట్‌ విలువ లక్షల కోట్ల రూపాయల్లో కరిగిపోయింది. సెన్సెక్స్‌ 1,045.46 పాయింట్లు లేదా 1.44 శాతం పడిపోయి రెండున్నరేండ్లకుపైగా కనిష్ఠ స్థాయిని తాకుతూ 71,593.24 పాయింట్ల వద్ద నిలిచింది. 2024 ఫిబ్రవరి 13 తర్వాత సూచీ ఈ స్థాయికి దిగజారడం ఇదే తొలిసారి. ఒకానొక దశలోనైతే ఇది 1,310.95 పాయింట్లు క్షీణించింది. అలాగే నిఫ్టీ 371.25 పాయింట్లు లేదా 1.64 శాతం కోల్పోయి 21 నెలల కనిష్ఠాన్ని సూచిస్తూ 22,231.80 పాయింట్ల వద్ద స్థిరపడింది.

ఇంట్రా-డేలో 423.15 పాయింట్లు పతనమైంది. దీంతో సూచీ 52 వారాల కనిష్ఠాన్ని చూసింది. బుధవారం సెన్సెక్స్‌ (429.11 పాయింట్లు), నిఫ్టీ (173.05 పాయింట్లు) నష్టపోయాయి. ఇక భారీ నష్టాలతో బీఎస్‌ఈలో నమోదైన కంపెనీల మార్కెట్‌ విలువ ఈ ఒక్కరోజే రూ.10,01,898.68 కోట్లు హరించుకుపోయింది. దీంతో రూ.4,60,97,032 కోట్ల (4.76 ట్రిలియన్‌ డాలర్లు)కు పడిపోయింది. రిలయన్స్‌ ఇండస్ట్రీస్‌ షేరు విలువ 2 శాతం తరిగిపోవడంతో ఈ ఒక్కరోజే రూ.40 వేల కోట్ల మార్కెట్‌ విలువ కోల్పోయింది. కాగా, ఈ ఏడాది మొదలు ఇప్పటిదాకా సెన్సెక్స్‌ 13,627.36 పాయింట్లు లేదా 16 శాతం పడిపోయింది. అలాగే నిఫ్టీ 3,897.8 పాయింట్లు లేదా 14.91 శాతం నష్టపోయింది.