లోతు దుక్కులు మేలు

తెలంగాణ సాగుభూముల్లో పోషకాలకు కొదువ లేదని ప్రొ॥ జయశంకర్‌ తెలంగాణ రాష్ట్ర వ్యవసాయ విశ్వవిద్యాలయం శాస్త్రవేత్తలు చెబుతున్నారు. వేసవి దుక్కులపై పలు సలహాలు, సూచనలను వారు అందించారు.

• ఇప్పటికే కోతలు పూర్తయిన పొలాలను ఈ వేసవిలోనే చదును చేసుకొని, సేంద్రియ ఎరువులు చల్లుకోవాలి.
• తొలకరికి ముందుగానే నేలను కనీసం రెండుసార్లయినా లోతుగా దున్నుకోవాలి.
• వర్షాలు ప్రారంభం కాకముందే పొలాలను సాగుకు సిద్ధం చేసుకోవాలి.
• చెరువుల్లోని ఒండ్రుమట్టిని పొలాల్లో వేయించుకుంటే మంచిది. ఇది చేనుకు ఎంతో మేలు చేస్తుంది.
• పశువుల పేడనూ వీలైనంత ఎక్కువగా వాడుకోవాలి.
• కొన్నిచోట్ల యాసంగిలో వేరుశనగ కోసిన వెంటనే లోతు దుక్కులు చేసుకోవాలి. వేసవి దుక్కులతో ప్రయోజనాలు
• వేసవి దుక్కులతో వర్షపు నీటిని సమర్థవంతంగా వినియోగించుకొనే అవకాశం ఉంటుంది.
• ఈ దుక్కులవల్ల నేలలోని నీరు ఇంకని పొరలు తొలగిపోయి, నీరు ఇంకే గుణం పెరుగుతుంది.
• ఫలితంగా పొలంలో కురిసిన వర్షపు నీరు అక్కడికక్కడే నేలలోకి ఇంకి, భూగర్భ జలాలు పెరుగుతాయి.
• నేలకోతను నిలువరించి, నేలతోపాటు భూసారాన్నీ కాపాడుతుంది.
• వేసవిలో పగలు వేడి తాపానికి, రాత్రి చల్లదనానికి నేల మొత్తం గుల్లగా తయారవుతుంది. దీనివల్ల నేల ఆకృతి వృద్ధి చెందుతుంది.
• ఫలితంగా పంటకాలంలో మొక్కల వేర్లు నేల లోపలి పొరలకు చేరుతాయి. నేలలోని గాలిశాతం పెరిగి, సూక్ష్మజీవాల సంఖ్య వృద్ధి చెందుతుంది.
• పంటకు చెందిన సేంద్రియ వ్యర్థాలు పూర్తిగా, త్వరగా కుళ్లిపోయి, భూసారం పెరుగుతుంది.
• వర్షాధార పంటల్లో తక్కువ వర్షపాతం నమోదైనప్పుడు, పంటవేర్లు లోతుగా ఉండటం వల్ల నేలలోపలి పొరల్లోని తేమను వినియోగించుకొని బెట్టను తట్టుకునే శక్తి వస్తుంది.
• వేసవిలో దున్నడం వల్ల నేల పొరల్లోని క్రిములు, పురుగుల కోశస్త దశలు బహిర్గతమై చనిపోతాయి.
• కలుపు విత్తనాలూ నశించిపోతాయి. దీనివల్ల తర్వాతి పంటకాలంలో కలుపు దరి చేరదు.
• వేసవిలో లోతు దుక్కులతో జూన్‌ నెలలో తొలకరి మొదలైన వెంటనే పంట విత్తడం సులభమవుతుంది.