ప్రేమ కిరీటం!

‘చాలా రోజుల తర్వాత ఆత్మీయులను కలవడం సంతోషంగా ఉంది. నా వాళ్లు గర్వపడే విజయం సాధించానని అనుకుంటున్నా. ఇలాంటి కుటుంబం దొరకడం నా అదృష్టం.

‘చాలా రోజుల తర్వాత ఆత్మీయులను కలవడం సంతోషంగా ఉంది. నా వాళ్లు గర్వపడే విజయం సాధించానని అనుకుంటున్నా. ఇలాంటి కుటుంబం దొరకడం నా అదృష్టం. ఈ క్షణం ఎప్పటికీ గుర్తుండిపోతుంది’ అంటూ ఉద్వేగానికి గురైంది ‘లివా మిస్‌ దివా సూపర్‌నేషనల్‌- 2022’ కిరీటాన్ని దక్కించుకున్న తెలంగాణ అమ్మాయి ప్రజ్ఞ అయ్యగారి. విజయ మకుటంతో హైదరాబాద్‌లో అడుగుపెట్టిన ప్రజ్ఞకు ఘన స్వాగతం లభించింది.

‘ప్రౌడ్‌ డాడ్‌’, ‘ప్రౌడ్‌ మామ్‌’ వంటి ప్లకార్డులతో స్వాగతం పలికి.. కూతురిని ముద్దులతో ముంచెత్తారు తల్లిదండ్రులు మాధవి, శ్రీనివాస్‌. అందాల కిరీటాన్ని అమ్మానాన్నలకు అలంకరించి తన విజయాన్ని అంకితమిచ్చిందీ అందాల భామ. ప్రజ్ఞ క్వాలిఫైడ్‌ ఫ్యాషన్‌ డిజైనర్‌. భరతనాట్య కళాకారిణి. చదరంగం అంటే ఇష్టం. కొరియన్‌ మూవీస్‌ తెగ చూస్తుంది. ఎకోఫ్రెండ్లీ వస్ర్తాలతో ఓ బ్రాండ్‌ సృష్టించాలన్నది తన కల. అందాలపోటీతో వచ్చే పేరు, డబ్బు ఇందుకు ఉపయోగపడతాయని నమ్ముతున్నది ప్రజ్ఞ. బోయిన్‌పల్లిలోని సెయింట్‌ ఆండ్రూస్‌లో తన స్కూలింగ్‌ పూర్తయింది. ఆ తర్వాత ఫ్యాషన్‌ డిజైనింగ్‌ కోర్సు చేసింది.