నమస్తే. తలస్నానం తర్వాత హీట్ బ్లో హెయిర్ డ్రైయర్ వాడటం నాకు అలవాటు. వేసవిలో ఇది సురక్షితమేనా? ఏమైనా ఇబ్బంది కలుగుతుందా?
కేశాలు మనిషి తలకు రక్షణ వ్యవస్థ లాంటివి. ఎండ వేడి నుంచి మాడుకు నీడనిస్తాయి. ప్రమాదాల్లో దెబ్బలు తగలకుండా మెదడుకు సుతిమెత్తని కవచంలా పనిచేస్తాయి. అందులోనూ సేబమ్ అనే జిడ్డు పదార్థం కేశాలు పొడిబారకుండా, తద్వారా శరీరం వేడెక్కకుండా నిలువరిస్తుంది. వేసవిలో మనం అనాలోచితంగా చేసే పనులు జుట్టుకు తీవ్ర నష్టం కలిగిస్తాయి. కేశ సంపదను నాశనం చేస్తాయి.
ఎలాంటి రక్షణా లేకుండా మిట్ట మధ్యాహ్నం బయటికి వెళ్లడం వల్ల.. వెంట్రుకలు సున్నితత్వాన్ని కోల్పోతాయి. చిట్లి పోతాయి. పొడిబారి రాలిపోతాయి. రంగు మారిపోతుంది కూడా. వేసవిలో తలస్నానం తర్వాత తరచూ బ్లో డ్రైయర్ వాడటం అంత మంచిది కాదు. దీనివల్ల, చర్మం విడుదల చేసే సహజ తైలాలు మటుమాయం అవుతాయి. తప్పనిసరి అయినప్పుడు కోల్డ్ బ్లో డ్రైయర్ ఎంచుకోవడమే ఉత్తమం. నిజానికి, కేశాలకు ప్రకృతి సిద్ధమైన ఉత్పత్తులే మేలు.
డాక్టర్ అనున్యా రెడ్డిఇ.ఎన్.టి సర్జన్,
ఎలర్జీ స్పెషలిస్ట్, ఫేషియల్ కాస్మటిక్ సర్జన్