ఆర్కే-7 గని నార్త్‌లో ఉత్పత్తి నిలిపివేత

శ్రీరాంపూర్‌ ఏరియా ఆర్కే-7 గనిలో నార్త్‌ ఉత్పత్తి పనిస్థలాల్లో ఉత్పత్తి నిలిపివేయాలని కేంద్ర పర్యావరణ శాఖ ఉత్తర్వులు జారీ చేసినట్టు తెలిసింది. నార్త్‌ భాగంలో బొగ్గు ఉత్పత్తికి 2020 వరకే అనుమతి ఇచ్చినట్టు పేర్కొంది.

• డిప్యూటేషన్లపై 300 మంది కార్మికుల బదిలీ

శ్రీరాంపూర్‌, జూలై 13 : శ్రీరాంపూర్‌ ఏరియా ఆర్కే-7 గనిలో నార్త్‌ ఉత్పత్తి పనిస్థలాల్లో ఉత్పత్తి నిలిపివేయాలని కేంద్ర పర్యావరణ శాఖ ఉత్తర్వులు జారీ చేసినట్టు తెలిసింది. నార్త్‌ భాగంలో బొగ్గు ఉత్పత్తికి 2020 వరకే అనుమతి ఇచ్చినట్టు పేర్కొంది. 2019 నుంచి గని విస్తరణకు అనుమతి కోసం కేంద్ర పర్యావరణ, అటవీ శాఖ డైరెక్టర్‌ జనరల్‌కు సింగరేణి యాజమాన్యం నాలుగుసార్లు విజ్ఞప్తి చేసినప్పటికీ తిరస్కరించినట్టు తెలిసింది.

అనుమతి వచ్చే వరకు ఉత్పత్తి నిలిపివేయాలని అధికారులు శనివారం ఆదేశించినట్టు సమాచారం. నార్త్‌ పని స్థలాల్లో ఉత్పత్తి నిలిచిపోవడంతో సుమారు 300 మంది ఉద్యోగులను ఇతర గనులకు తాత్కాలికంగా డిప్యూటేషన్‌పై బదిలీ చేయనున్నారు. నెల రోజుల్లో తిరిగి బొగ్గు ఉత్పత్తికి అనుమతులు వచ్చే అవకాశం ఉన్నదని, అప్పుడు తిరిగి కార్మికులను ఆర్కే-7గనికి తీసుకుంటామని జీఎం సంజీవరెడ్డి పేర్కొన్నారు. అనుమతులివ్వడంలో కేంద్రం జాప్యం సరికాదని టీబీజీకేఎస్‌ రాష్ట్ర ప్రధాన కార్యదర్శి కే సురేందర్‌రెడ్డి అన్నారు. డిప్యూటేషన్‌పై బదిలీ చేయడంతో కార్మికులు ఇబ్బంది పడుతున్నారని ఆయన పేర్కొన్నారు.