Power Consumption | హైదరాబాద్, మార్చి 29 (నమస్తే తెలంగాణ): మండేఎండలతో రాష్ట్రవ్యాప్తంగా విద్యుత్తు వినియోగం రికార్డుస్థాయిలో పెరుగుతున్నది. మే నెలలో నమోదయ్యే రికార్డుస్థాయి వాడకం మార్చి నెలలోనే నమోదవడం గమనార్హం. శుక్రవారం ఒక్కరోజే రాష్ట్రంలో గరిష్ఠ విద్యుత్తు డిమాండ్ 289.697 మిలియన్ యూనిట్లకు చేరింది. నిరుడు మార్చి చివరి వారంలో నమోదైన రికార్డు ఈ ఏడు మార్చి మొదటి వారంలోనే బద్దలైంది. నిరుడు మార్చి 30న రాష్ట్రంలో 15,497 మెగావాట్లు ఉండగా, ఈ ఏడాది మార్చి 8వ తేదీనే 15,623 మెగావాట్లతో ఆ రికార్డునే అధిగమించింది. ఈ ఏడాది మార్చి 14న 308.54 మిలియన్ యూనిట్లతో అత్యధిక విద్యుత్తు వినియోగం నమోదైంది. ఎండలు మండుతుండటం, వరుసగా సెలవుల కారణంగా అంతా ఇంటిపట్టునే ఉండటంతో పట్టణ ప్రాంతాల్లో వినియోగం అమాంతం పెరుగుతున్నది. గ్రేటర్ హైదరాబాద్లోనే 15 శాతం డొమెస్టిక్ విద్యుత్తు వినియోగం పెరిగింది. గ్రేటర్లో వినియోగదారుల సంఖ్య పెరుగుదలతో విద్యుత్తు డిమాండ్ మరింతగా పెరిగింది.
రాష్ట్రవ్యాప్తంగా వ్యవసాయానికీ విద్యుత్తు డిమాండ్ సైతం పెరిగింది. చెరువుల, వాగులు ఎండిపోయాయి. నీళ్లు లేక పంటలు ఎండిపోతున్నాయి. ఈ పరిస్థితుల్లో రైతులంతా బోర్లు, బావుల మీదున్న విద్యుత్తు మోటర్లపై ఆధారపడుతున్నారు. దీంతో వ్యవసాయానికి సరఫరా అవుతున్న విద్యుత్తు 2-5 శాతం పెరిగింది. దీంతో రాష్ట్రంలో విద్యుత్తు సరఫరాపై డేంజర్బెల్స్ మోగుతున్నాయి. ఎండలు మరింతగా పెరిగితే డిమాండ్కు అనుగుణంగా విద్యుత్తు అందుతుందా లేదా అన్న అనుమానాలు వ్యక్తమవుతున్నాయి. దీంతో విద్యుత్తు డిమాండ్, సరఫరా తీరుపై అధికారులు ఎప్పటికప్పుడు పర్యవేక్షిస్తున్నారు.
దక్షిణ తెలంగాణ విద్యుత్తు పంపిణీ సంస్థ పరిధిలోని గ్రేటర్ హైదరాబాద్లో విద్యుత్తు వినియోగం రికార్డులనే తిరగరాస్తున్నది. నిరుడు మే 19న 79.33 మిలియన్ యూనిట్ల విద్యుత్తు వినియోగంతో రికార్డు నమోదైంది. గత గురువారం ఒక్క గ్రేటర్లోనే 79.48 మిలియన్ యూనిట్ల రికార్డుస్థాయి విద్యుత్తు వినియోగం నమోదు కావడం గమనార్హం. నిరుడు మార్చిలో గ్రేటర్ అత్యధిక విద్యుత్తు వినియోగం 67.97 మిలియన్ యూనిట్లు మాత్రమే. మార్చి నెల సరాసరి విద్యుత్తు వినియోగం 57.84 మిలియన్ యూనిట్లు. ఈ ఏడాది మార్చి వరకు సరాసరి విద్యుత్తు వినియోగం 70.96 మిలియన్ యూనిట్లకు చేరనున్నది. దీంతో దాదాపు 22.7 శాతం పెరుగుదల నమోదైంది. 15 జిల్లాలతో కూడిన టీఎస్ఎస్పీడీసీఎల్ పరిధిలో పరిశీలిస్తే 2023 మార్చి 3న 188.60 మిలియన్ యూనిట్లు వినియోగం కాగా, ఈ ఏడాది మార్చి 13న గరిష్ఠగా 202.45 మిలియన్ యూనిట్లుగా నమోదైంది.