Election Effect | ఎన్నికల ఎఫెక్ట్‌.. పన్నుల చెల్లింపుతో పంచాయతీలకు కాసుల గలగల

Election Effect | స్థానిక ఎన్నికల ఎఫెక్ట్‌తో తాండూర్ మండలంలో ఇంటి పన్నులు జోరుగా వసూలు అవుతున్నాయి.

తాండూర్ : స్థానిక ఎన్నికల ఎఫెక్ట్‌ ( Election effect ) తో తాండూర్ మండలంలో ఇంటి పన్నులు( House Taxes ) జోరుగా వసూలు అవుతున్నాయి. సర్పంచ్, వార్డు సభ్యుడిగా ఎన్నికల్లో పోటీ చేయాలంటే వారి ఇంటి పన్ను మెత్తం చెల్లించాలని నిబంధన ఉంది. పోటీ చేసే అభ్యర్థిని బలపరిచే వ్యక్తి కూడా ఇంటి పన్ను మొత్తం చెల్లించాలనే రూల్స్‌ ఉండడంతో ఎన్నికల్లో పోటీ చేసే ఆశావహులు ఇంటి పన్నులు చెల్లిస్తూ క్లియరెన్స్ రశీదు తీసుకుంటున్నారు.

దీంతో గ్రామాల్లో పెద్ద మొత్తంలో పెండింగ్ లో ఉన్న ఇంటి పన్నులు చాలా వరకు వసూలు అవుతున్నాయి. గతంలో కార్యదర్శులు, గ్రామపంచాయతీ సిబ్బంది ఇంటింటికి తిరిగి ఇంటి పన్నులు అడిగినా కూడా లెక్కచేయని ప్రజలు ప్రస్తుతం క్యూలు కడుతూ గ్రామపంచాయతీ సిబ్బందిని వెదుకుతూ ఇంటి పన్నులు చెల్లించేందుకు బారులు తీరుతున్నారు.

ఇదే అదనుగా గ్రామపంచాయతీ సిబ్బంది నామినేషన్ కేంద్రాలలో కౌంటర్లు ఏర్పాటు చేసి పన్నుల వసూలలో బిజీబిజీ అయ్యారు. స్థానిక ఎన్నికల పుణ్యమా అని గ్రామపంచాయతీలలో పెండింగ్ లో ఉన్న ఇంటి పన్నులు వసూలు అయి గ్రామాభివృద్ధికి తోడ్పడతాయని కార్యదర్శులు, సిబ్బంది పేర్కొన్నారు.