‘సాగర్’ నోటీసుల్లో గందరగోళం
నాగార్జునసాగర్ రిజర్వాయర్ నుంచి ఏకంగా గండి పెట్టి తాగునీటి పేరుతో ఏపీ సర్కార్ చేస్తున్న జలదోపిడీ కుట్రలపై నేటికీ స్పందించని తెలంగాణ సర్కార్ తీరుపై అనుమానాలు వ్యక్తమవుతున్నాయి.
- నోటీసులు ఇచ్చామంటున్న ఇరిగేషన్ ఉన్నతాధికారులు
- మాకు నోటీసులే అందలేదన్న ఎన్నెస్పీ అధికారులు
- ఆంధ్రా అధికారికి ఉన్నతాధికారి అండదండలు?
- అందుకే నోటీసులు జారీ చేయడంలో ఉదాసీనత!
- పనులపై ఆగస్టులోనే తెలిసినా దాచిపెట్టిన వైనం?
నల్లగొండ ప్రతినిధి, నవంబర్19(నమస్తే తెలంగాణ): నాగార్జునసాగర్ రిజర్వాయర్ నుంచి ఏకంగా గండి పెట్టి తాగునీటి పేరుతో ఏపీ సర్కార్ చేస్తున్న జలదోపిడీ కుట్రలపై నేటికీ స్పందించని తెలంగాణ సర్కార్ తీరుపై అనుమానాలు వ్యక్తమవుతున్నాయి. ‘పల్నాడ్ వాటర్గ్రిడ్’ పేరుతో ఏపీ సర్కార్ చేపట్టిన ప్రాజెక్టుకు నిరుడే బీజం పడినా దీన్ని గుర్తించడంలో తెలంగాణ సర్కార్ వైఫల్యం చెందడంపై తీవ్ర విమర్శలు వెల్లువెత్తుతున్నాయి. ఇప్పటికీ రాష్ట్ర ప్రభుత్వం సీరియస్గా స్పందించడమే లేదు. సాగర్ రైట్బ్యాంకు వైపున ముమ్మరంగా సాగుతున్న ఇన్టేక్ వెల్ తవ్వకం పనులను గుర్తించడంలో నాగార్జునసాగర్ ఇరిగేషన్ సర్కిల్ అధికారులు విఫలమైనట్టు ఇప్పటికే స్పష్టమైంది. ఇందుకు కారణమైన నాగార్జున సాగర్ సర్కిల్ అధికారులకు షోకాజు నోటీసులు జారీ చేసినట్టు ఇరిగేషన్ శాఖ ఉన్నతాధికారులు వెల్లడించారు. తమకు ఆ నోటీసులు అందలేదని స్థానిక అధికారులు చెప్తున్నారు.
కానీ గురువారం రాత్రి వరకు సంబంధిత అధికారులకు అవి చేరలేదంటే కూడా మరిన్ని అనుమానాలు వ్యక్తమవుతున్నాయి. ఇరిగేషన్ ఉన్నతాధికారులు వివరాల ప్రకారం.. సాగర్ సర్కిల్లోని డ్యామ్ ఎస్ఈ మల్లికార్జునరావు, ఈఈ గోపీనాథ్కు షోకాజ్ నోటీసులు జారీ చేసినట్టు తెలిసింది. ఈ నోటీసుల్లో లేవనెత్తిన అంశాలకు వారం రోజుల్లో సంజాయిషీ ఇవ్వాలని కోరినట్టు సమాచారం. అయితే ఇలాంటి షోకాజ్ నోటీసులేవీ తమకు ఇంకా అందలేదని సంబంధిత అధికారులు చెప్తున్నారు. ఇలాంటి సీరియస్ అంశాల్లో నోటీసులు వెంటనే అందేలా చర్యలు తీసుకుంటారు. కానీ వీటిని జారీ చేయడంలోనూ ఉదాసీనతే కనిపిస్తున్నది. ఇదే విషయాన్ని సర్కిల్ సీఈ గురువారం సాయంత్రం మంత్రి ఉత్తమ్ దృష్టికి కూడా తీసుకెళ్లినట్టు తెలిసింది. అయితే నోటీసుల విషయంలోనూ ఆంధ్ర ప్రాంతానికి చెందిన సంబంధిత అధికారి పైస్థాయిలో మేనేజ్ చేస్తున్నారా? అన్న సందేహాలు నెలకొన్నాయి.
ఆగస్టులోనే తెలిసినా నిర్లక్ష్యం
ఈ ఏడాది ఆగస్టులోనే సాగర్ రిజర్వాయర్లో ఏపీ సర్కార్ ఇన్టేక్ వెల్ పనులు చేపట్టినట్టు సాగర్ సర్కిల్ ఇరిగేషన్ కింది స్థాయి అధికారులు గుర్తించినట్టు తెలిసింది. పనులు జరుగుతున్న ప్రాంతాన్ని డీఈ, ఏఈ స్థాయి అధికారులు పరిశీలించి వివరాలు సేకరించారు. వీటిని వెంటనే ఎస్ఈ స్థాయి అధికారికి తెలిపినట్టు సమాచారం. కానీ ఎస్ఈ ఆంధ్ర ప్రాంతానికి చెందినవారు కావడంతో ‘తాగునీటి కోసమే కదా!’ అని తేలికగా కొట్టిపడేసినట్టు సాగర్ ఇరిగేషన్ సర్కిల్లో చర్చ జరుగుతున్నది. పైగా ఈ సమాచారాన్ని పైస్థాయిలోని సీఈకి గానీ, ఇతర ఉన్నతాధికారులకు గానీ చెప్పకుండా దాచేశారని సమాచారం.
ఈలోపే ఏపీ సర్కార్ శరవేగంగా పనులను కొనసాగిస్తూ వస్తున్నది. సాగర్ బ్యాక్వాటర్లో కనిష్టంగా 492 అడుగుల వద్ద కూడా నీటిని తోడుకొనేలా ఏపీ ప్రభుత్వం ఇన్టేక్ వెల్కు రూపకల్పన చేసి నిర్మాణం మొదలుపెట్టింది. ఇన్టేక్ వెల్లో సాగర్ కనీస నీటిమట్టం 510 వద్ద, ఆ పైన, దిగువన 492 అడుగుల వద్ద.. ఇలా మూడు స్థాయిల్లో కృష్ణా నీటిని తోడ్కొని వెళ్లేలా డిజైన్ చేసినట్టు తెలిసింది. అందులోభాగంగా పైకి ఇన్టేక్ వెల్ కాంక్రీట్ నిర్మాణం చేస్తూ దాని లోపల బ్లాస్టింగ్తో అడుగుభాగం తవ్వకం పనులు చేస్తున్నట్టు సమాచారం. ఈ పనులన్నీ పైకి బహిరంగంగానే కనిపిస్తున్నా కూడా సాగర్లో తెలంగాణ వైపు ఉన్న ఇరిగేషన్ అధికారులు తేలికగా తీసుకోవడం ఇప్పుడు చర్చనీయాంశంగా మారింది.
ఆంధ్రా అధికారి వైఖరితో ముప్పు
సాగర్ సర్కిల్ ఇరిగేషన్ శాఖలో చాలాకాలంగా అక్కడే తిష్టవేసి ఈఈగా.. ఆ తర్వాత ప్రస్తుత ఎస్ఈ బాధ్యతలు నిర్వర్తిస్తున్న ఆంధ్ర అధికారి వైఖరితోనే పరిస్థితి ఇంత దాకా వచ్చిందన్న ఆరోపణలు వెల్లువెత్తుతున్నాయి. ఆయనకు తెలంగాణ ఇరిగేషన్ శాఖలో ఉన్నతస్థానంలో ఉన్న ఓ ఆంధ్ర అధికారి అండదండలు పుష్కలంగా ఉన్నాయని సమాచారం. ఆయన అండదండలతోనే ఎస్ఈ సాగర్ సర్కిల్లో ఇష్టారాజ్యంగా వ్యవహారిస్తున్నట్టు చర్చ సాగుతున్నది. దీంతో పాటు ఏపీ ఇరిగేషన్ అధికారులతోనూ సన్నిహిత సంబంధాలు కొనసాగిస్తున్నట్టు తెలిసింది.
గతంలోనూ ఇక్కడ ఈఈగా పనిచేసిన ఓ అధికారి.. ఈయన వ్వవహారశైలితోనే ఇక్కడి నుంచి వెళ్లిపోయినట్టు ఇతర అధికారులు చెప్తున్నారు. ప్రస్తుతం మిర్యాలగూడలో ఈఈగా పనిచేస్తున్న అధికారికి అదనపు బాధ్యతలు ఇచ్చారు. ఈ మొత్తం వ్యవహారంలో కీలక ంగా సదరు అధికారిపైనే బుధవారం మంత్రి కోమటిరెడ్డి వెంకట్రెడ్డి కూడా ‘ను వ్వు ఆంధ్ర అధికారివి కావడం వల్లే సైలెంట్గా ఉన్నావా?’ అంటూ సీరియస్ అయినట్టు వార్తలు వెలువడ్డాయి. అయితే ఇంత జరుగుతున్నా గురువారం రాత్రి వరకు షోకాజు నోటీసులేవీ తమకు అందలేదని సంబంధిత అధికారులు చెప్తుండంపై ప్రభుత్వ తీరుపైనే సందేహాలు వెల్లువెత్తుతున్నాయి.
Read Today's Latest Telangana News in Telugu and Telugu News
RELATED ARTICLES
తాజా వార్తలు
ట్రెండింగ్ వార్తలు
Vande Bharat Train | బంధువులను సాగనంపేందుకు వందే భారత్ రైలు ఎక్కిన 12 మంది.. తర్వాత ఏం జరిగిందంటే?
Watch: హాస్పిటల్ యజమానిని బెదిరించి రూ.10 లక్షలు వసూలు.. కాంగ్రెస్ నేత అరెస్ట్, పార్టీ నుంచి బహిష్కరణ
Watch: ‘బ్యాగ్లో గంజాయి పెడతా.. డ్రగ్స్ కేసులో ఇరికిస్తా’.. జంటను బెదిరించిన పోలీస్ అధికారి
Migratory birds | చిలికా సరస్సుకు ప్రత్యేక అతిథులు.. ఏకంగా 80 జాతుల వలసపక్షుల సందడి.. Video
China flies electric plane | 19 సీట్ల ఎలక్ట్రిక్ విమానం.. విజయవంతంగా నడిపి పరీక్షించిన చైనా

