సినర్‌ కొత్త చరిత్ర

ప్రపంచ నంబర్‌ వన్‌ టెన్నిస్‌ ఆటగాడు యానిక్‌ సినర్‌ సొంతగడ్డపై ఇటాలియన్‌ ఓపెన్‌ టైటిల్‌నుకైవసం చేసుకుని సరికొత్త చరిత్ర సృష్టించాడు.

రోమ్‌: ప్రపంచ నంబర్‌ వన్‌ టెన్నిస్‌ ఆటగాడు యానిక్‌ సినర్‌ సొంతగడ్డపై ఇటాలియన్‌ ఓపెన్‌ టైటిల్‌నుకైవసం చేసుకుని సరికొత్త చరిత్ర సృష్టించాడు. ఆదివారం జరిగిన పురుషుల సింగిల్స్‌ ఫైనల్లో ఇటలీ స్టార్‌ సినర్‌ 6-4, 6-4తో కాస్పర్‌ రూడ్‌ (నార్వే)ను చిత్తు చేశాడు. దాంతో సినర్‌ ఏటీపీలోని మొత్తం 9 మాస్టర్స్‌ 1000 టైటిళ్లు గెలిచి కెరీర్‌ గోల్డెన్‌ మాస్టర్స్‌ పూర్తి చేసిన యంగెస్ట్‌ ప్లేయర్‌గా నిలిచాడు.

అంతేకాకుండా 1976లో అడ్రియానో పనటా తర్వాత ఈ టైటిల్‌ను ముద్దాడిన ఇటలీ ఆటగాడిగా రికార్డులకెక్కాడు. టెన్నిస్‌ చరిత్రలో నోవాక్‌ జొకోవిచ్‌ తర్వాత మొత్తం తొమ్మిది ఏటీపీ మాస్టర్స్‌ 1000 ఈవెంట్లను గెలుచుకున్న రెండో ఆటగాడిగా సినర్‌ నిలిచాడు. అలాగే, ఏటీపీ మాస్టర్స్‌ 1000 టోర్నీల్లో తన వరుస విజయాల రికార్డును 34 మ్యాచ్‌లకు పొడిగించాడు.