Temple Device | గిల్, పీవీ సింధు నుదిటిపై వింత పరికరం.. అసలు ఆ డివైజ్ ఏంటి? దాన్ని ఎందుకు వాడుతున్నారు?

Temple Device | టీమిండియా టెస్టు, వన్డే కెప్టెన్‌ శుభ్‌మన్‌ గిల్‌ నుదుటిపై కనిపించిన ఓ చిన్న పరికరం ఇప్పుడు ఆసక్తికర చర్చకు దారితీసింది. అసలు ఆ డివైజ్ ఏంటి? దాన్ని ఎందుకు ధరించాడనేది చర్చనీయాంశంగా మారింది. ఈ నేపథ్యంలో ఆ పరికరం గురించి ఇప్పుడు తెలుసుకుందాం..

Temple Device | టీమిండియా టెస్టు, వన్డే కెప్టెన్‌ శుభ్‌మన్‌ గిల్‌ నుదుటిపై కనిపించిన ఓ చిన్న పరికరం ఇప్పుడు ఆసక్తికర చర్చకు దారితీసింది. న్యూజిలాండ్‌తో వన్డే సిరీస్‌కు సన్నద్ధమవుతున్న భారత జట్టు గురువారం ఆక్లాండ్‌లో సాధన చేస్తుండగా.. గిల్‌ ఈ పరికరాన్ని ధరించి కనిపించాడు. సాధారణంగా ఆటగాళ్లు చేతికి స్మార్ట్‌వాచ్‌లు, ఫిట్‌నెస్‌ బ్యాండ్లు ధరిస్తుంటారు. అందుకు భిన్నంగా నుదుటిపై ఈ చిన్న డివైజ్‌ ఉండటంతో అసలు ఇదేంటనే ఆసక్తి మొదలైంది. అసలు ఆ డివైజ్ ఏంటి? దాన్ని ఎందుకు ధరించాడనేది చర్చనీయాంశంగా మారింది. ఈ నేపథ్యంలో ఆ పరికరం గురించి ఇప్పుడు తెలుసుకుందాం..

అసలేంటి డివైజ్!

గిల్ ధరించిన డివైజ్ పేరు ‘టెంపుల్‌’ (Temple). శరీర ఫిట్‌నెస్‌తో పాటు మెదడుకు సంబంధించిన శారీరక సంకేతాలను పర్యవేక్షించడమే దీని ప్రత్యేకత. జొమాటో వ్యవస్థాపకుడు దీపిందర్‌ గోయల్‌ మద్దతుతో పనిచేస్తున్న బృందం ఈ టెంపుల్‌ పరికరాన్ని అభివృద్ధి చేస్తోంది. ప్రస్తుతం ఇది పరీక్షల దశలో ఉంది. సాధారణ ఫిట్‌నెస్‌ ట్రాకర్ల మాదిరిగా గుండె స్పందన, అడుగులు, కేలరీల లెక్కలకే పరిమితం కాకుండా.. మెదడుకు రక్తప్రసరణ, ఆక్సిజన్‌ స్థాయుల్లో వచ్చే మార్పులను అంచనా వేయడం దీని ప్రధాన ఉద్దేశం. ఈ పరికరాన్ని నుదుటి పక్కభాగంలో కణత సమీపాన అమర్చుకుంటారు. దీని పనితీరు, ప్రత్యేకతలపై ఇప్పటికే ఆసక్తి పెరగ్గా.. ప్రముఖ క్రీడాకారులు ఉపయోగిస్తుండటం మరింత చర్చకు కారణమైంది.

గతంలో పీవీ సింధు కూడా..

శుభ్‌మన్‌ గిల్‌ కంటే ముందే భారత బ్యాడ్మింటన్‌ స్టార్‌ పీవీ సింధు ఈ టెంపుల్‌ పరికరాన్ని ఉపయోగించింది. 2026 ఏప్రిల్‌లో డెన్మార్క్‌లో జరిగిన థామస్‌ అండ్‌ ఉబెర్‌ కప్‌ సందర్భంగా ఆమె నుదుటిపై ఈ డివైజ్‌తో కనిపించింది. ఆ తర్వాత ఆగస్టులో ఢిల్లీలో జరిగిన బీడబ్ల్యూఎఫ్‌ ప్రపంచ బ్యాడ్మింటన్‌ ఛాంపియన్‌షిప్‌లోనూ ధరించింది. ఇది అప్పట్లో వైరల్ కావడంతో సింధు భర్త వెంకట దత్తసాయి దానిపై స్పందించారు. సింధు శారీరక కొలమానాలను పర్యవేక్షించేందుకు ఈ పరికరాన్ని పరీక్షిస్తున్నారని వెల్లడించారు. ప్రస్తుతం ప్రయోగ దశలో ఉన్న ఈ టెక్నాలజీని ప్రముఖ క్రీడాకారులు ఉపయోగిస్తుండటం ఆసక్తికరంగా మారింది.

మెదడులో ఏం జరుగుతుందో ఎలా తెలుసుకుంటుంది?

టెంపుల్‌ పరికరం కాంతి ఆధారిత సెన్సింగ్‌ సాంకేతికతతో పనిచేస్తుంది. నియర్‌ ఇన్‌ఫ్రారెడ్‌ స్పెక్ట్రోస్కోపీ (NIRS) తరహా సాంకేతికత ద్వారా కణజాలాల్లో రక్తప్రసరణ, ఆక్సిజనేషన్‌కు సంబంధించిన మార్పులను అంచనా వేయవచ్చు. ఈ తరహా సెన్సార్లు సేకరించే సమాచారంతో మెదడుకు సంబంధించిన శారీరక సంకేతాలను విశ్లేషించడం టెంపుల్‌ లక్ష్యం.

శారీరక శ్రమ పెరిగినప్పుడు, విశ్రాంతి తీసుకుంటున్నప్పుడు, ఒత్తిడికి గురైనప్పుడు శరీరంలో ఎలాంటి మార్పులు చోటుచేసుకుంటున్నాయో తెలుసుకునేందుకు ఈ డేటా ఉపయోగపడే అవకాశం ఉంది. ఇంకా చెప్పాలంటే.. చేతికి ధరించే స్మార్ట్‌వాచ్‌ గుండె స్పందన, అడుగులను పర్యవేక్షించినట్లే.. టెంపుల్‌ మెదడుకు సంబంధించిన కొన్ని శారీరక సంకేతాలపై దృష్టి పెడుతుంది.

అలసట, ఒత్తిడి, ఏకాగ్రతపై అవగాహన?

టెంపుల్‌ డివైజ్ ద్వారా సేకరించే సమాచారాన్ని విశ్లేషించడం వల్ల శారీరక శ్రమ, మానసిక ఒత్తిడి, నిద్ర, విశ్రాంతి వంటి అంశాలు శరీరంపై చూపే ప్రభావాన్ని అర్థం చేసుకునేందుకు అదనపు సమాచారం లభించవచ్చు. ముఖ్యంగా మెదడు పనితీరుకు సంబంధించిన శారీరక స్పందనలు, శరీరంపై పడుతున్న ఒత్తిడిని పరిశీలించేందుకు ఈ టెక్నాలజీని అభివృద్ధి చేస్తున్నారు.

గిల్‌ వంటి ఆటగాళ్లకు ఉపయోగమేంటి?

అంతర్జాతీయ క్రీడాకారులు నిరంతరం శిక్షణ, పోటీలతో బిజీగా ఉంటారు. ఈ క్రమంలో శరీరంపై పడే ఒత్తిడి, అలసట, కోలుకునేందుకు పట్టే సమయం వంటి అంశాలను పర్యవేక్షించడం చాలా ముఖ్యం. టెంపుల్‌ ద్వారా లభించే అదనపు సమాచారంతో శిక్షణ సమయంలో శరీరం ఎలా స్పందిస్తోంది? విశ్రాంతి తర్వాత ఎలాంటి మార్పులు వస్తున్నాయి? వంటి అంశాలను అధ్యయనం చేసే అవకాశం ఉంటుంది.

క్రికెట్‌లో బ్యాటింగ్‌ చేసేటప్పుడు ఏకాగ్రత, నిర్ణయాలు తీసుకునే సామర్థ్యం కీలకం. ఈ నేపథ్యంలో మెదడుకు సంబంధించిన శారీరక సంకేతాలపై సమాచారం ఆటగాళ్ల శిక్షణ, రికవరీ ప్రణాళికలకు ఉపయోగపడుతుందని భావిస్తున్నారు. అయితే గిల్‌ ఈ పరికరాన్ని ఏ ప్రత్యేక ప్రయోజనం కోసం ఉపయోగిస్తున్నాడనే విషయంపై ఎలాంటి అధికారిక ప్రకటన వెలువడలేదు. అతడి ఆటతీరుపై దీని ప్రభావం ఏమిటనేదీ ఇంకా తెలియాల్సి ఉంది.