Visit:
న్యూయార్క్: యూఎస్ ఓపెన్లో అతి పెద్ద సంచలనం. గాయం నుంచి కోలుకొని వచ్చి వరుస విజయాలతో దూసుకెళ్తున్న డిఫెండింగ్ చాంపియన్, స్పెయిన్ స్టార్ కార్లోస్ అల్కరాస్కు షాక్ తగిలింది. గ్రాండ్స్లామ్స్లో వరుసగా 18 మ్యాచ్ల్లో ఓటమి ఎరుగని అతని జైత్రయాత్రకు బ్రేక్ పడింది. బుధవారం అర్థరాత్రి ఉత్కంఠగా సాగిన క్వార్టర్ ఫైనల్ పోరులో అమెరికా యువ ఆటగాడు, 8వ సీడ్ షెల్టన్ 6-7 (5/7), 6-1, 6-3, 1-6, 7-6 (10/7)తో రెండో సీడ్ కార్లోస్కు షాక్ ఇచ్చాడు. 4 గంటల 28 నిమిషాల పాటు సాగిన ఈ మ్యాచ్ స్థానిక కాలమానం ప్రకారం తెల్లవారుజామున 3:33 గంటలకు ముగిసింది. యూఎస్ ఓపెన్ టోర్నీ చరిత్రలోనే అత్యంత ఆలస్యంగా ముగిసిన మ్యాచ్గా ఇది రికార్డులకెక్కింది.
తొలి సెట్ను టై బ్రేక్లో కోల్పోయినా రెండో సెట్ నుంచి వరుసగా 9 గేమ్లు గెలుచుకుని షెల్టన్ 2-1 ఆధిక్యంలో నిలిచాడు. మరోవైపు అనారోగ్య సమస్య వేధించినప్పటికీ అల్కరాస్ నాలుగో సెట్ గెలిచి మ్యాచ్ను నిర్ణయాత్మక ఐదో సెట్కు తీసుకెళ్లాడు. ఐదో సెట్ టైబ్రేకర్లో అతను 5-3తో ముందంజ వేసినా షెల్టన్ పోరాటం వదల్దేదు. తన రాకెట్ పవర్తో వరుస పాయింట్లు సాధించాడు. 146 మైళ్ల వేగంతో పవర్ఫుల్ ఏస్ కొట్టి షెల్టన్ మ్యాచ్ ముగించాడు. షెల్టన్ కెరీర్లో ఇది మూడో గ్రాండ్స్లామ్ సెమీఫైనల్ కాగా.. ఓ ప్రపంచ టాప్-3 ఆటగాడిపై అతనికి ఇదే తొలి విజయం కావడం విశేషం. ఈ మ్యాచ్లో ఏడు ఏస్లు కొట్టిన షెల్టన్, ఐదు బ్రేక్పాయింట్లు నెగ్గాడు. రెండు డబుల్ పాల్ట్స్, 35 తప్పిదాలు చేశాడు. మూడు ఏస్లు, 3 బ్రేక్ పాయింట్లకే పరిమితం అయిన అల్కరాస్ ఏకంగా ఏడు డబుల్ ఫాల్ట్స్, 53 అనవసర తప్పిదాలు చేసి మూల్యం చెల్లించుకున్నాడు.
తియఫో పోరాటం అదరహో
షెల్టన్ సంచలన ప్రదర్శనకు ముందు మరో అమెరికన్, 11వ సీడ్ ఫ్రాన్సిస్ తియఫో అసాధారణ పోరాట పటిమను చూపించాడు. 4 గంటల 38 నిమిషాల పాటు జరిగిన ఉత్కంఠ పోరులో తియఫో 5-7, 3-6, 7-5, 6-3, 7-6 (10/6)తో తోటి ఆటగాడు అలెక్స్ మిచెల్సన్పై గెలిచి సెమీస్ చేరాడు.తొలి రెండు సెట్లు కోల్పోవడమే కాకుండా, నిర్ణయాత్మక ఐదో సెట్లో 0-3తో వెనుకబడినప్పటికీ తియఫో పట్టువదలకుండా పోరాడి విజయం అందుకున్నాడు. సెమీఫైనల్లో షెల్టన్, తియఫో తలపడనుండటంతో ఓ అమెరికన్ ఫైనల్ చేరడం ఖాయమైంది.
రిబాకినా నం.1 విక్టరీ
మహిళల సింగిల్స్లో రెండో సీడ్ ఎలీనా రిబాకినా తొలిసారి యూఎస్ ఓపెన్ సెమీస్ చేరింది. దాంతో పాటు సబలెంకాను వెనక్కునెట్టి అధికారికంగా వరల్డ్ నంబర్ వన్ ర్యాంక్ అందుకుంది. చైనాకు చెందిన అన్సీడెడ్ ప్లేయర్ క్విన్వెన్ జెంగ్ విసిరిన సవాల్ను ఛేదించిన కజకిస్థాన్ అమ్మాయి రిబాకినా టైటిల్ దిశగా ముందంజ వేసింది. తొలి సెట్ కోల్పోయినా పుంజుకున్న కజక్ స్టార్ 3-6, 6-1, 6-4తో జెంగ్ను ఓడించింది. మరో మ్యాచ్లో మూడో సీడ్ జెస్సికా పెగులా (అమెరిక) 3-6, 6-4, 6-3తో తన దేశానికే చెందిన 26వ సీడ్ నవారోను ఓడించి సెమీస్ చేరింది.
