న్యూఢిల్లీ: సాకర్ స్టార్ క్రిస్టియానో రొనాల్డోపై టీమ్ఇండియా మాజీ కెప్టెన్ విరాట్ కోహ్లీ మరోసారి తన అభిమానాన్ని చాటుకున్నాడు. ఫిఫా ప్రపంచకప్ నుంచి పోర్చుగల్ నిష్క్రమించడంతో.. సామాజిక మాధ్యమాల్లో రొనాల్డోపై భావోద్వేగపూరిత పోస్ట్ పెట్టాడు. ‘ఈ ఆటలో నువ్వు సాధించిన ఘనతలు, అభిమానులకు అందించిన స్ఫూర్తికి ఏ ట్రోఫీ సాటిరానిది. విశ్వవ్యాప్తంగా అభిమానులపై నీ ప్రభావాన్ని మించింది లేదు. నీ ఆట చూసినపుడు కలిగే అనుభూతి ఏ టైటిలూ వర్ణించలేదు.
ఆట కోసం ప్రతి క్షణం ప్రాణం పెట్టడం.. కఠోర శ్రమ, అకింత భావానికి నిలువెత్తు నిదర్శనం నువ్వు. అందుకే నువ్వే నాకు గ్రేటెస్ట్ ఆఫ్ ఆల్ టైమ్’ అని కోహ్లీ రాసుకొచ్చాడు. పోర్చుగల్ తరఫున 195 మ్యాచ్లాడిన రొనాల్డో 118 గోల్స్ చేశాడు. జట్టుకు ఎన్నో చిరస్మరణీయ విజయాలందించినా.. ప్రపంచకప్ మాత్రం అతడికి కలగానే మిగిలింది. ప్రస్తుతం 37 ఏండ్ల రొనాల్డో మరో ప్రపంచకప్ వరకు జట్టులో కొనసాగుతాడా అనేది అనుమానమే!