Australia Open 2024: లేడీ నాదల్గా గుర్తింపు దక్కించుకున్న పోలండ్ బామ, మహిళల టెన్నిస్లో నెంబర్ వన్ ర్యాంకర్గా ఉన్న ఇగా స్వియాటెక్కు ఆస్ట్రేలియా ఓపెన్లో ఊహించని షాక్ తగిలింది. ఇప్పటివరకూ ఈ టోర్నీ గెలవని ఈ పోలండ్ సంచలనం.. మరోసారి ఉత్తచేతులతోనే వెనుదిరిగింది. మూడో రౌండ్లో ఇగా స్వియాటెక్.. 6-3, 3-6, 4-6 తేడాతో లిండా నోస్కోవా (చెక్ రిపబ్లిక్) చేతిలో ఓడిపోయింది. ఈ ఓటమితో 2024లో అయినా ఆస్ట్రేలియా ఓపెన్ గెలవాలన్న పట్టుదలతో మెల్బోర్న్కు వచ్చిన స్వియాటెక్ కలలు కల్లలయ్యాయి.
తన కెరీర్లో నాలుగు గ్రాండ్ స్లామ్స్ గెలిచిన స్వియాటెక్.. ఆస్ట్రేలియా ఓపెన్లో ఇప్పటిదాకా సెమీస్ కూడా దాటిన రికార్డు లేదు. నాలుగేండ్లుగా ఆస్ట్రేలియా ఓపెన్ ఆడుతున్న ఆమె.. 2022 సీజన్లో మాత్రమే సెమీస్కు చేరుకోగలిగింది. గతేడాది కూడా ఆమె నాలుగో రౌండ్లోనే ఇంటిముఖం పట్టాల్సి వచ్చింది. తాజాగా ప్రిక్వార్టర్స్ కూడా చేరకుండానే నిష్క్రమించింది. ఇప్పటివరకూ ఆమె నాలుగు గ్రాండ్ స్లామ్స్ గెలవగా అందులో మూడు ఫ్రెంచ్ ఓపెన్ (2020, 2022, 2023) లోనివే. 2022లో ఆమె యూఎస్ ఓపెన్ నెగ్గింది.
The biggest win of her career 👏
A night to remember for Linda Noskova! ✨#AusOpen • #AO2024 • @wwos • @espn • @eurosport • @wowowtennis pic.twitter.com/ptb9gFkKUW
— #AusOpen (@AustralianOpen) January 20, 2024
ఇక తాజా టోర్నీ విషయానికొస్తే.. స్వియాటెక్ తొలి రౌండ్లో 2020 ఆస్ట్రేలియా ఓపెన్ విన్నర్ సోఫియా కెనిన్ను ఓడించింది. రెండో రౌండ్లో 2022 ఆస్ట్రేలియా ఓపెన్ ఫైనలిస్టు డానియల్లె కొలిన్స్తో అతికష్టమ్మీద గెలిచింది. కానీ మూడో రౌండ్లో మాత్రం వయసులో తనకంటే చిన్నదైన చెక్ అమ్మాయి చేతిలో పరాభవం మూటగట్టుకుంది. ఈ మ్యాచ్లో తొలి సెట్ గెలిచిన ఇగా.. తర్వాత తడబడింది. అనవసర తప్పిదాలతో రెండో సెట్ కోల్పోయిన ఇగా.. మూడో సెట్లోనూ ఓడి ఆస్ట్రేలియా ఓపెన్ నుంచి నిష్క్రమించింది. ఆస్ట్రేలియా ఓపెన్లో ఇప్పటిదాకా 23 మ్యాచ్లు ఆడిన స్వియాటెక్.. 17 గెలిచి ఆరు ఓడింది.
“𝙎𝒉𝙚 𝙬𝒂𝙨 𝙛𝒆𝙖𝒓𝙡𝒆𝙨𝒔”
Linda Noskova knocks out world No.1 Iga Swiatek 3-6 6-3 6-4 😱🤯#AusOpen pic.twitter.com/R7kX4EdVH8
— Eurosport (@eurosport) January 20, 2024