పడుకునేముందు రూంలోని ప్రతీ లైట్ను ఆర్పేయండి. కిటికీ కర్టెన్లు మూసేయండి. రూంలో చిన్న లైట్కూడా వెలుగొద్దు. రూమంతా గాడాంధకారంగా మారిపోవాలి. బెడ్రూంలో రాత్రిపూట చిన్న లైట్ వెలిగినా మీరు అనారోగ్యంపాలైనట్లే అంటున్నారు పరిశోధకులు. మసక వెలుతురు కూడా నిద్రలో హృదయనాళ పనితీరును దెబ్బతీస్తుంది. మరుసటి రోజు ఉదయం ఇన్సులిన్ నిరోధకత (insulin resistance)ను పెంచుతుంది. దీంతో గుండెపోటు, మధుమేహం బారినపడే ప్రమాదం ఉంది.
ఈ విషయాలు యూఎస్లోని నార్త్వెస్టర్న్ యూనివర్సిటీలో పరిశోధకుల అధ్యయనంలో తేలాయి. పరిశోధకులు కొంతమందిని రెండువర్గాలుగా విభజించారు. ఒక వర్గంవారు ఒకరాత్రి 3 లక్స్ (మసక కాంతి) కాంతిలో, మరో వర్గంవారు 100 లక్స్ (మితమైన కాంతి)కాంతిలో నిద్రించేలా చూశారు. మితమైన కాంతిలో నిద్రించినవారి హృదయస్పందన రేటు ఎక్కువగా ఉన్నట్లు తేల్చారు. సాధారణంగా హృదయస్పందన రేటు రాత్రి తక్కువగా ఉండాలి. పగలు ఎక్కువగా ఉండాలి. కానీ, మితమైన కాంతిలో నిద్రించేవారి హార్ట్బీట్ పగలులాగే రాత్రికూడా ఉందని పరిశోధకులు తేల్చారు. మనం పడుకున్నా స్వయంప్రతిపత్త నాడీ వ్యవస్థ యాక్టివ్గా ఉంటోందని, ఇది మంచిదికాని పరిశోధనకు నేతృత్వం వహించిన డాక్టర్ ఫిల్లిస్ జీ వెల్లడించారు.
అలాగే, తేలికపాటి కాంతిలో నిద్రించినవారిలో ఉదయం లేవగానే ఇన్సులిన్ నిరోధకత సంభవిస్తున్నట్లు పరిశోధకులు తేల్చారు. ఇన్సులిన్ రెసిస్టెన్స్ అంటే మీ కండరాలు, కొవ్వు, కాలేయంలోని కణాలు ఇన్సులిన్కు బాగా స్పందించకపోవడమే. రక్తంలోని గ్లూకోజ్ని ఉపయోగించి శక్తిని ఉత్పత్తి చేయలేకపోవడమే ఇన్సులిన్ రెసిస్టెన్స్ అంటారు. దీంతో ప్యాంక్రియాస్ మరింత ఇన్సులిన్ను ఉత్పత్తి చేస్తుంది. దీంతో రక్తంలో షుగర్లెవల్స్ పెరిగిపోతాయని ఫిల్లిస్ జీ తెలిపారు. నిద్ర, పోషకాహారం, వ్యాయామంతోపాటు రాత్రిపూట కాంతికి దూరంగా ఉంటే ఆరోగ్యం బాగుంటుందని స్పష్టంచేశారు. ఈ అధ్యయన ఫలితాలు పీఎన్ఏఎస్ జర్నల్లో ప్రచురితమయ్యాయి.