గ్రీన్ ఎన‌ర్జీ : ఆవు పేడ‌తో న‌డిచే తొలి ట్రాక్ట‌ర్ ఆవిష్క‌ర‌ణ‌

గ్రీన్ ఎన‌ర్జీతో వ్య‌వ‌సాయాన్ని కొత్త పుంత‌లు తొక్కించే క్ర‌మంలో ఈ రంగంలో విప్ల‌వాత్మ‌క మార్పుల‌కు శ్రీకారం చుట్టేలా ఓ బ్రిట‌న్ కంపెనీ ఆవు పేడ‌తో నడిచే 270 హార్స్‌ప‌వ‌ర్ క‌లిగిన టీ7 లిక్విడ్ మీథేన్ ఇంధ‌న‌ ట్రాక్ట‌ర్‌ను ఆవిష్క‌రించింది.

లండ‌న్ : గ్రీన్ ఎన‌ర్జీతో వ్య‌వ‌సాయాన్ని కొత్త పుంత‌లు తొక్కించే క్ర‌మంలో ఈ రంగంలో విప్ల‌వాత్మ‌క మార్పుల‌కు శ్రీకారం చుట్టేలా ఓ బ్రిట‌న్ కంపెనీ ఆవు పేడ‌తో నడిచే 270 హార్స్‌ప‌వ‌ర్ క‌లిగిన టీ7 లిక్విడ్ మీథేన్ ఇంధ‌న‌ ట్రాక్ట‌ర్‌ను ఆవిష్క‌రించింది. సాధార‌ణ డీజిల్ ఇంజ‌న్ల‌కు దీటుగా ఈ ట్రాక్ట‌ర్ పెర్ఫామెన్స్ ఉంటుంది. ప్ర‌పంచంలో ఇదే తొలి టీ7 లిక్విడ్ మీథేన్ ఫ్యూయ‌ల్డ్ ట్రాక్ట‌ర్ అని, ఇది వ్య‌వ‌సాయ ప‌రిశ్ర‌మ‌లో కార్బ‌న్ ఉద్గారాల‌ను గ‌ణ‌నీయంగా త‌గ్గిస్తుంద‌ని మీథేన్ ఎన‌ర్జీ ఉత్ప‌త్తుల‌ను త‌యారుచేసే కంపెనీ బెన‌మ‌న్ స‌హ‌వ్య‌వ‌స్ధాప‌కులు క్రిస్ మాన్ పేర్కొన్నారు.

కార్బ‌న్ ఉద్గారాల‌ను త‌గ్గిస్తూ మెరుగైన సామ‌ర్ధ్యంతో కూడిన ట్రాక్ట‌ర్ల‌ను అందుబాటులోకి తీసుకువ‌చ్చేలా ఈ ఆవిష్క‌ర‌ణ చేప‌ట్టామ‌ని చెప్పారు. కాన్‌వాల్ కౌంటీలోని వ్య‌వ‌సాయ క్షేత్రంలో ఈ ట్రాక్ట‌ర్ ట్ర‌య‌ల్ ర‌న్ నిర్వ‌హించ‌గా కార్బ‌న్‌డ‌యాక్సైడ్ వాయువులు ఏడాదిలో 2500 మెట్రిక్ ట‌న్నుల నుంచి 500 మెట్రిక్ ట‌న్నుల‌కు త‌గ్గాయ‌ని వెల్ల‌డైంది. డీజిల్ త‌ర‌హాలోనే అదే స్ధాయిలో ట్రాక్ట‌ర్ క్ర‌యోజనిక్ ట్యాంక్ ప‌వ‌ర్‌ను అందించ‌గా కార్బ‌న్ ఉద్గారాల‌ను గ‌ణ‌నీయంగా త‌గ్గించింది.

కంపెనీ గ‌త మోడ‌ల్ టీ6 మిథేన్ ప‌వ‌ర్ సీఎన్‌జీ ట్రాక్ట‌ర్‌తో పోలిస్తే ఈ ట్రాక్టర్ ఇంధ‌న సామ‌ర్ధ్యం నాలుగు రెట్లు అధిక‌మ‌ని బెన్‌మ‌న్ తెలిపింది. టీ7 మీథేన్ ప‌వ‌ర్ ఎల్ఎన్‌జీ ట్రాక్ట‌ర్ నాన్ వెంటింగ్ క్ర‌యోజ‌నిక్ స్టోరేజ్ ట్యాంక్ మీథేన్ లిక్విడ్‌ను మెయింటైన్ చేస్తూ క్లీన్ ప‌వ‌ర్‌ను నూత‌న వ‌న‌రుగా సేద్య రంగం ముందుకు తీసుకువచ్చింది. డీజిల్ ట్రాక్ట‌ర్ల త‌ర‌హాలోనే ఎల్ఎన్‌జీని భ‌ద్రంగా స్టోర్ చేసేందుకు అనువైన స్పేస్‌తో స్టెయిన్‌లెస్ స్టీల్ క్ర‌యోజ‌నిక్ ట్యాంక్‌ను ట్రాక్ట‌ర్‌లోప‌ల ఏర్పాటు చేశామ‌ని కంపెనీ తెలిపింది.