ఆన్‌లైన్‌ అప్పు ముప్పే!

ఇటీవల, ఒక ఆన్‌లైన్‌ ఫైనాన్స్‌ యాప్‌ నుంచి రూ.25 వేలు వ్యక్తిగత రుణం తీసుకున్నాను. పన్నెండు వాయిదాల్లో తీర్చాలి. ఆరు వాయిదాలు సక్రమంగా చెల్లించిన తర్వాత, రుణ పరిమితి పెంచారు. మరో రూ. 25 వేలు అప్పు తీసుకున్నాను. రెండు వాయిదాలు చెల్లించిన తర్వాత మళ్లీ ‘మీరు రూ.10 వేల రుణానికి అర్హులు’ అని మెసేజ్‌ వచ్చింది. ఆ మొత్తమూ తీసుకున్నాను. ఇప్పుడు, మూడు రుణాల వాయిదాలు చెల్లించడం కష్టంగా మారింది. అప్పు ఇచ్చే సమయంలో సిబిల్‌ స్కోర్‌
ఆధారంగా క్షణాల్లో డబ్బు ఖాతాలో వేస్తున్నారు. కానీ, వడ్డీ భారీగా వసూలు చేస్తున్నారేమో అని భయంగా ఉంది. రుణ యాప్‌లకు దూరంగా ఉండటం ఎలా?

శ్రీప్రియ, హైదరాబాద్‌

రుణం తీసుకోవడం తప్పు కాదు. ఎందుకు తీసుకుంటున్నారన్నది ముఖ్యం. అత్యవసర సమయాల్లో పరిమిత మొత్తంలో తీసుకోవచ్చు. కాకపోతే సరదాల కోసమో, గ్యాడ్జెట్స్‌ కొనడానికో, మార్కెట్‌లోకి కొత్త ఫోన్‌ వచ్చిందనో, ఆఫర్లు ఉన్నాయనో.. తాత్కాలిక అవసరాలకు రుణాలు తీసుకోవడం వల్ల ముప్పు తప్పదు. చాలా రుణ యాప్‌లు వడ్డీ 15 శాతమనే పేర్కొంటాయి. అయితే, ఇవి చక్రవడ్డీ వసూలు చేస్తాయి. ఈ లెక్కలు అందరికీ అర్థం కావు. శాస్త్రవేత్త ఐన్‌స్టీన్‌ చక్రవడ్డీని ప్రపంచంలో ఎనిమిదో వింత అన్నాడంటేనే.. ఆ లెక్కలు ఎంత దారుణంగా ఉంటాయో అర్థం చేసుకోవచ్చు. ఆన్‌లైన్‌ యాప్‌లో రుణం తీసుకునే ముందు వడ్డీ మీద వడ్డీ చెల్లించాల్సి వస్తుందన్న విషయాన్ని గుర్తు చేసుకోండి. ఇప్పుడున్న వాయిదాలు నెలలవారీగా చెల్లించి, ఇకనుంచి వాటికి వీలైనంత దూరంగా ఉండండి. అన్నిటికన్నా ముఖ్యంగా మన రాబడిని దృష్టిలో ఉంచుకొని, ఖర్చులు అదుపు చేసుకోవాలి. ఆర్థిక క్రమశిక్షణ పాటిస్తే.. ఇలా అప్పులు చేయాల్సిన పరిస్థితి రాదు.

దీప నిట్టల చార్టర్డ్‌ వెల్త్‌ మేనేజర్‌
డైరెక్టర్‌, శ్రీమంత్రణ ఫైనాన్షియల్‌ సర్వీసెస్‌