TVK leader arrested | వర్షంలో లిఫ్ట్‌ ఇచ్చే నెపంతో.. విద్యార్థినిని లైంగికంగా వేధించిన టీవీకే నేత

TVK leader arrested | వర్షంలో లిఫ్ట్ ఇస్తానని చెప్పి టీవీకే నేత ఒక విద్యార్థినిని లైంగికంగా వేధించారు. ఆ యువతి ఫిర్యాదుతో పోలీసులు కేసు నమోదు చేశారు. దర్యాప్తు తర్వాత ఆ టీవీకే నేతను అరెస్ట్‌ చేశారు.

చెన్నై: వర్షంలో లిఫ్ట్ ఇస్తానని చెప్పి టీవీకే నేత ఒక విద్యార్థినిని లైంగికంగా వేధించారు. ఆ యువతి ఫిర్యాదుతో పోలీసులు కేసు నమోదు చేశారు. దర్యాప్తు తర్వాత ఆ టీవీకే నేతను అరెస్ట్‌ చేశారు. (TVK leader arrested) తమిళనాడులోని కన్యాకుమారి జిల్లాలో ఈ సంఘటన జరిగింది. ఈ నెల ప్రారంభంలో రెండవ సంవత్సరం పోస్ట్ గ్రాడ్యుయేట్ చదువుతున్న ఇద్దరు విద్యార్థినులు కాలేజీ తర్వాత బస్సు కోసం వేచి ఉన్నారు. టీవీకే జిల్లా కేంద్ర కార్యవర్గ సభ్యుడైన క్రిస్టోఫర్‌ కారులో అటుగా వెళ్తూ వీరిని చూశారు. తన కారులో లిఫ్ట్‌ ఇస్తానని ఆయన చెప్పారు. వర్షం కురుస్తుండటంతో అంగీకరించిన ఆ విద్యార్థినులు ఆయన కారు ఎక్కారు.

కాగా, టీవీకే నేత క్రిస్టోఫర్ ముందుగా ఒక విద్యార్థిని ఆమె ఇంటి సమీపంలో దింపారు. ఆ తర్వాత మరో విద్యార్థినితో కారులో ప్రయాణం కొనసాగించారు. తాను కులశేఖరం వైపు వెళ్తున్నానని ఆమెను అక్కడ దింపుతానని చెప్పారు.

అయితే టీవీకే నేత క్రిస్టోఫర్ మార్గమధ్యలో కారు ఆపి తనను లైంగికంగా వేధించినట్లు ఆ విద్యార్థిని ఆరోపించింది. ఈ విషయాన్ని తన తల్లిదండ్రులకు చెప్పిన తర్వాత వారి సహాయంతో పోలీసులకు ఫిర్యాదు చేసింది. దీంతో కేసు నమోదు చేసి దర్యాప్తు చేపట్టారు. టీవీకే నేత క్రిస్టోఫర్‌ను తాజాగా పోలీసులు అరెస్ట్‌ చేశారు.

మరోవైపు ప్రతిపక్షాలైన డీఎంకే, ఏఐఏడీఎంకేలు అధికార టీవీకేపై మండిపడ్డాయి. ఈ నేపథ్యంలో మంత్రి సీటీ నిర్మల్ కుమార్ స్పందించారు. ఆ నేతపై పార్టీపరంగా చర్యలు తీసుకుంటామని ఆయన చెప్పారు.
‘చాలామంది పార్టీలో చేరి, తమను తాము టీవీకే సభ్యులుగా చెప్పుకుంటున్నారు. ఎవరైనా తప్పు చేస్తే, డీఎంకే ప్రభుత్వంలో మాదిరిగా కాకుండా నిర్ణీత విధానాల ప్రకారమే చర్యలు తీసుకుంటాం’ అని ఆయన అన్నారు.