Swati Sachdeva | మరో స్టాండప్‌ కమెడియన్‌ అసభ్య వ్యాఖ్యలు.. మండిపడుతున్న నెటిజన్‌లు

Swati Sachdeva | ఇటీవల యూట్యూబర్‌ రణ్‌వీర్‌ అల్లహాబాదియా (Ranveer Allahbadia), స్టాండప్‌ కమెడియన్‌ కునాల్‌ కమ్రా చేసిన వ్యాఖ్యలపై తీవ్రస్థాయిలో విమర్శలు వ్యక్తమయ్యాయి. ఈ నేపథ్యంలో తాజాగా మరో స్టాండప్‌ కమెడియన్‌ వివాదాస్పద వ్యాఖ్యలు చేసి వార్తల్లో నిలిచారు.

Swati Sachdeva : ఇటీవల యూట్యూబర్‌ రణ్‌వీర్‌ అల్లహాబాదియా (Ranveer Allahbadia), స్టాండప్‌ కమెడియన్‌ కునాల్‌ కమ్రా చేసిన వ్యాఖ్యలపై తీవ్రస్థాయిలో విమర్శలు వ్యక్తమయ్యాయి. ఈ నేపథ్యంలో తాజాగా మరో స్టాండప్‌ కమెడియన్‌ వివాదాస్పద వ్యాఖ్యలు చేసి వార్తల్లో నిలిచారు. స్టాండప్‌ కమెడియన్‌ స్వాతి సచ్‌దేవా (Swati Sachdeva).. తాను ఊహించని విధంగా ఒక విషయంలో తన తల్లికి దొరికిపోయానని, ఆ సమయంలో ఆమెతో మాట్లాడటానికి ఎంతో ఇబ్బంది పడ్డానని చెప్పింది. ఆమె ఏ విషయంలో దొరికిందో కూడా తెలిపింది. ఆ వ్యాఖ్యలకు సంబంధించిన వీడియో క్లిప్‌ ఇప్పుడు సోషల్ మీడియాలో వైరల్‌గా మారింది.

దీంతో నెటిజన్లు ఆమె వ్యాఖ్యలను తీవ్రంగా ఖండిస్తున్నారు. ఇలాంటి వారిపై కఠిన చర్యలు తీసుకోవాలని డిమాండ్‌ చేస్తున్నారు. మనం ఎప్పుడూ చూడని అత్యంత భయంకరమైన కామెడీలలో ఇదీ ఒకటని ఓ నెటిజన్‌ కామెంట్‌ చేశాడు. ప్రేక్షకులను నవ్వించడానికి అసభ్యకర అంశాలను ఎంచుకోవడం సిగ్గుచేటని మరో నెటిజన్‌ రాసుకొచ్చారు. ప్రస్తుతం సోషల్‌ మీడియాలో స్టాండప్‌ కామెడీ హద్దులు దాటుతోందని, షోలలో ఇలాంటి కంటెంట్‌ను ప్రోత్సహించకూడదని అన్నారు.

కాగా ఇటీవల ‘ఇండియాస్‌ గాట్‌ లేటెంట్‌’ షో వేదికగా యూట్యూబర్‌ రణ్‌వీర్‌ అలహబాదియా చేసిన వ్యాఖ్యలు తీవ్ర దుమారం రేపాయి. పలువురు ప్రముఖులు ఈ వ్యాఖ్యలను ఖండించారు. అతడిపై పలు కేసులు నమోదయ్యాయి. స్టాండప్‌ కమెడియన్‌ కునాల్‌ కమ్రా మహారాష్ట్ర డిప్యూటీ సీఎం ఏక్‌నాథ్‌ షిండేపై వివాదాస్పద వ్యాఖ్యలు చేయడంతో ఆయనపై అక్కడి నేతలు కేసులు పెట్టారు. తాజాగా స్వాతి సచ్‌దేవా అసభ్య వ్యాఖ్యలు చేశారు. సోషల్‌ మీడియాలో ఇలాంటి కంటెంట్‌ నియంత్రణపై ప్రభుత్వం కఠిన చర్యలు తీసుకోవాలని పలువురు డిమాండ్‌ చేస్తున్నారు.