న్యూఢిల్లీ: కజకిస్తాన్లో భారీ స్థాయిలో మీథేన్ గ్యాస్(Methane Gas) లీకైంది. గత ఏడాది ఈ ఘటన జరిగినట్లు రికార్డుల ద్వారా తెలుస్తోంది. సుమారు లక్షా 27 వేల టన్నుల గ్యాస్ లీకైనట్లు తెలుస్తోంది. సుమారు ఆరు నెలల పాటు ఆ లీకేజీ జరిగింది. కార్బన్ డైఆక్సైడ్ తరహాలో మీథేన్ కూడా అతి కీలకమైన గ్రీన్హౌజ్ గ్యాస్. బుచాచి నెఫ్ట్ అనే కంపెనీ బావి నుంచి ఆ గ్యాస్ లీకైంది. అమెరికా గ్రీన్హౌజ్ ఏజెన్సీ ప్రకారం.. ఆ లీకైన గ్యాస్ వల్ల సుమారు ఏడు లక్షల కార్లు ఏడాది పాటు తిరగవచ్చు అని తెలుస్తోంది. ఎన్ని రోజుల పాటు ఏ స్థాయిలో లీక్ జరిగిందన్న దానిపై క్లారిటీ ఇవ్వలేమని, కానీ భారీ స్థాయిలో మీథేన్ లీకైనట్లు యూఎన్ అధికారి తెలిపారు. గత ఏడాది జూన్ 9వ తేదీన మంగిస్తాన్ ప్రాంతంలో ఉన్న ఓ బావి నుంచి మీథేన్ లీకైంది. డ్రిల్లింగ్ చేస్తున్న సమయంలో జరిగిన విస్పోటనం వల్ల ఆ గ్యాస్ లీకేజీ జరిగింది. అయితే డిసెంబర్ 25వ తేదీ వరకు ఆ లీకేజీ కొనసాగింది. దాని ఆధారంగా భారీ మొత్తంలో మీథేన్ గ్యాస్ లీకై ఉంటుందని భావిస్తున్నారు.