Man Kills Wife, Strips Body | భార్యను హత్య చేసి దుస్తులు తొలగించిన భర్త.. హత్యాచారంగా నమ్మించేందుకు యత్నం

Man Kills Wife, Strips Body | ఒక వ్యక్తి తన భార్యను అనుమానించాడు. ఈ నేపథ్యంలో గొంతు నొక్కి ఆమెను హత్య చేశాడు. ఆ తర్వాత భార్య దుస్తులు తొలగించి మృతదేహాన్ని ఒకచోట పడేశాడు. ఆమెపై హత్యాచారం జరిగినట్లు నమ్మించేందుకు ప్రయత్నించాడు.

చండీగఢ్‌: ఒక వ్యక్తి తన భార్యను అనుమానించాడు. ఈ నేపథ్యంలో గొంతు నొక్కి ఆమెను హత్య చేశాడు. ఆ తర్వాత భార్య దుస్తులు తొలగించి మృతదేహాన్ని ఒకచోట పడేశాడు. ఆమెపై హత్యాచారం జరిగినట్లు నమ్మించేందుకు ప్రయత్నించాడు. దర్యాప్తు చేసిన పోలీసులు ఆ వ్యక్తిని అరెస్ట్‌ చేశారు. (Man Kills Wife, Strips Body) పంజాబ్‌లోని హోషియార్‌పూర్ జిల్లాలో ఈ సంఘటన జరిగింది. పశ్చిమ బెంగాల్‌లోని మాల్దా జిల్లాకు చెందిన జహదూర్ ఇస్లాం తన భార్య రుబీనా ఖాతున్‌తో కలిసి పంజాబ్‌కు వలసవచ్చాడు. ముకేరియన్‌లోని మదీన్‌పూర్ గ్రామంలో వారు నివసిస్తున్నారు. మురుగునీటి కాలువలు, డ్రైనేజీలను శుభ్రపరిచే పనులు చేస్తూ జీవిస్తున్నారు.

కాగా, భార్య రుబీనా ఖాతున్‌కు మరో వ్యక్తితో వివాహేతర సంబంధం ఉన్నట్లు భర్త జహదూర్ అనుమానించాడు. దీంతో కొంతకాలంగా దంపతుల మధ్య గొడవలు జరుగుతున్నాయి. ఇటీవల పని ముగిసిన తర్వాత గ్రామం సమీపంలోని చెరువు వద్దకు భార్య రుబీనాను భర్త తీసుకెళ్లాడు. గుడ్డ తువ్వాలుతో ఆమె గొంతు నులిమి హత్య చేశాడు. ఆ తర్వాత రుబీనా శరీరంపై ఉన్న దుస్తులను తొలగించాడు. సమీపంలోని చెరకు తోటలో ఆమె నగ్న మృతదేహాన్ని పడేశాడు. రుబీనాపై అత్యాచారానికి పాల్పడి హత్య చేసినట్లుగా నమ్మించేందుకు ప్రయత్నించాడు.

మరోవైపు భార్య హత్య తర్వాత బీహార్‌లోని కతిహార్ జిల్లాకు చెందిన బావ సోహెల్ అలీకి, జహదూర్ ఫోన్ చేశాడు. తన భార్య రుబీనా కనిపించడం లేదని చెప్పాడు. దీంతో ఆందోళన చెందిన రుబీనా సోదరుడు హుటాహుటిన పంజాబ్‌లోని మదీన్‌పూర్ గ్రామానికి చేరుకున్నాడు. వారిద్దరూ రుబీనా కోసం వెతకడంతో పాటు పోలీసులకు ఫిర్యాదు చేశారు.

అయితే భార్య రుబీనా అదృశ్యంపై భర్త జహదూర్ ఇస్లాం పొంతన లేని సమాధానాలను పోలీసులకు చెప్పాడు. దీంతో అతడిపై అనుమానించి గట్టిగా ప్రశ్నించారు. చివరకు భార్యను తానే హత్య చేసినట్లు అతడు అంగీకరించాడని పోలీసులు తెలిపారు. నిందితుడి వివరాల ఆధారంగా చెరకు తోటలో పడేసిన రుబినా నగ్న మృతదేహాన్ని గుర్తించి పోస్ట్‌మార్టం కోసం తరలించారు.

కాగా, భార్యపై ఎవరో లైంగిక దాడికి పాల్పడి హత్య చేసినట్లుగా నమ్మించేందుకు నిందితుడు ఇలా చేశాడని పోలీస్‌ అధికారి తెలిపారు. జహదూర్ ఇస్లాంను అరెస్ట్‌ చేసినట్లు చెప్పారు. పలు సెక్షన్ల కింద కేసు నమోదు చేసి దర్యాప్తు చేస్తున్నట్లు వెల్లడించారు.