Doctors Save Passenger | విమానంలో ప్రయాణికురాలికి తీవ్ర అస్వస్థత.. ప్రాణాలు కాపాడిన ముగ్గురు డాక్టర్లు

Doctors Save Passenger | దీర్ఘకాలిక కిడ్నీ వ్యాధితో బాధపడుతున్న మహిళ చికిత్స కోసం విమానంలో ప్రయాణించారు.  అయితే ఆ విమానం గాలిలో ఉండగా ఆమె తీవ్ర అస్వస్థతకు గురైంది. ఆమె ఆక్సిజన్‌ స్థాయిలు కూడా పడిపోయాయి. ఈ సమాచారం తెలుసుకున్న ముగ్గురు డాక్టర్లు వెంటనే స్పందించారు. అత్యవసర చికిత్స అందించి ఆ మహిళ ప్రాణాలు కాపాడారు.

న్యూఢిల్లీ: దీర్ఘకాలిక కిడ్నీ వ్యాధితో బాధపడుతున్న మహిళ చికిత్స కోసం విమానంలో ప్రయాణించారు.  అయితే ఆ విమానం గాలిలో ఉండగా ఆమె తీవ్ర అస్వస్థతకు గురైంది. ఆమె ఆక్సిజన్‌ స్థాయిలు కూడా పడిపోయాయి. ఈ సమాచారం తెలుసుకున్న ముగ్గురు డాక్టర్లు వెంటనే స్పందించారు. అత్యవసర చికిత్స అందించి ఆ మహిళ ప్రాణాలు కాపాడారు. (Doctos Save Passenger) దేశ రాజధాని ఢిల్లీ నుంచి మిజోరం రాజధాని ఐజ్వాల్‌కు బయలుదేరిన విమానంలో దీర్ఘకాలిక మూత్రపిండ వ్యాధితో బాధపడుతున్న 32 ఏళ్ల మహిళ ప్రయాణించారు. ఆ విమానం గాలిలో ఉండగా ఆమెకు ఆక్సిజన్‌ స్థాయిలు 40 శాతానికి పడిపోవడంతో తీవ్ర అస్వస్థత చెందారు. ఊపిరి అందక తీవ్ర ఇబ్బందిపడ్డారు.

కాగా, ఆ ప్రయాణికురాలి పరిస్థితిని గమనించిన విమాన సిబ్బంది వైద్య సహాయం కోసం ఎనౌన్స్‌మెంట్‌ చేశారు. ఆ విమానంలో ప్రయాణిస్తున్న జనరల్ సర్జన్ డాక్టర్ విల్లీ లాల్‌హ్రుయిట్లుంగా, పీడియాట్రిషియన్ డాక్టర్ ఎఫ్ రెమ్‌థాంగ్‌పుయి, గ్యాస్ట్రోఎంటరాలజిస్ట్ డాక్టర్ బెంజమిన్ ఖియాంగ్టే వెంటనే స్పందించారు. ఆ మహిళకు అత్యవసర చికిత్స అందించారు. తొలుత మాస్క్ ద్వారా ఆక్సిజన్ అందించగా ఆక్సిజన్ స్థాయిలు 60 శాతానికి చేరాయి. స్టెరాయిడ్లు ఇవ్వడంతో ఆక్సిజన్ స్థాయిలు 90 శాతం మేర మెరుగుపడ్డాయి.

మరోవైపు ఆ ప్రయాణికురాలి ఆరోగ్య పరిస్థితి దృష్ట్యా ఆ విమానాన్ని కోల్‌కతాలో ఎమర్జెన్సీ ల్యాండింగ్‌ చేయాలని పైలట్లు తొలుత భావించారు. ఆమె ఆక్సిజన్ స్థాయిలు తాత్కాలికంగా స్థిరపడటంతో ఐజ్వాల్‌కు ప్రయాణాన్ని కొనసాగించారు. అయితే కొంతసేపటి తర్వాత ఆ ప్రయాణికురాలి ఆరోగ్యం మళ్లీ క్షీణించింది. దీంతో వైద్యులు ఇంట్యూబేషన్ చేయాలని భావించారు. విమానంలో అత్యవసర పరికరాలు పరిమితంగా ఉండటంతో అది సాధ్యపడలేదు. ఈ నేపథ్యంలో అంబులెన్స్‌ను సిద్ధంగా ఉంచాలని ఐజ్వాల్‌ విమానాశ్రయ సిబ్బందిని అలెర్ట్‌ చేశారు.

కాగా, ఆ విమానం ఎయిర్‌పోర్ట్‌లో ల్యాండ్‌ కాగానే అక్కడ సిద్ధంగా ఉంచిన అంబులెన్స్‌లోకి ఆ మహిళను  ఎక్కించారు. ఇంట్యూబేషన్ సెట్, ఎండోట్రాకియల్ ట్యూబ్ అందుబాటులో ఉండటంతో వైద్యులు ఇంట్యూబేషన్ చేశారు. అత్యవసర చికిత్సను కొనసాగించారు. అలాగే ఆ డాక్టర్లు ఐజ్వాల్‌లోని ఆసుపత్రులను సంప్రదించారు. చివరికి ఎల్ఆర్ఎం ఆసుపత్రిలో ఒక ఐసీయూ బెడ్ అందుబాటులో ఉండటంతో ఆ రోగితో పాటు ఇద్దరు వైద్యులు అక్కడకు వెళ్లారు. ఆ ప్రయాణికురాలికి ఎక్స్‌ట్యూబేషన్‌తో పాటు డయాలసిస్ చేసినట్లు సమాచారం. దీంతో ప్రస్తుతం ఆ మహిళ ఆరోగ్య పరిస్థితి నిలకడగా ఉన్నట్లు తెలుస్తున్నది.

అయితే ఆ రోగితో పాటు అంబులెన్స్‌లో వెళ్లిన ఇద్దరు వైద్యులు తమ లగేజ్‌ను ఎయిర్‌పోర్ట్‌లోనే వదిలేశారు. మరో డాక్టర్‌ అయిన బెంజమిన్ ఖియాంగ్టే వారికి సహాయం చేశారు. ఆ ఇద్దరు డాక్టర్ల లగేజ్‌ను ఆయన జాగ్రత్తగా చూసుకున్నారు.