బాలుడ్ని కాటేసిన పాము… అతడు కొరకడంతో పాము మృతి

దీపక్‌ చాలా భయాందోళన చెందాడు. పాము చుట్టుకున్న చేతిని గట్టిగా విదిలించాడు. ఆ పాము వీడక పోవడంతో తన నోటితో రెండు సార్లు ఆ పామును గట్టిగా కొరికాడు

రాయ్‌పూర్‌: ఇంటి ఆవరణలో ఆడుకుంటున్న బాలుడ్ని పాము కరిచింది. అయితే చేతికి చుట్టుకున్న ఆ నాగు పామును విదిలించినా వీడకపోవడంతో ఆ బాలుడు దానిని గట్టిగా పలుమార్లు కొరికాడు. దీంతో ఆ పాము మరణించింది. ఛత్తీస్‌గఢ్‌లోని జష్‌పూర్ జిల్లాలో ఈ వింత సంఘటన జరిగింది. ఎనిమిదేళ్ల దీపక్‌ తన ఇంటి వెనుక ఆడుకుంటున్నాడు. ఇంతలో ఒక నాగుపాము అతడి చేతికి చుట్టుకుని కాటేసింది. దీంతో దీపక్‌ చాలా భయాందోళన చెందాడు. పాము చుట్టుకున్న చేతిని గట్టిగా విదిలించాడు. ఆ పాము వీడక పోవడంతో తన నోటితో రెండు సార్లు ఆ పామును గట్టిగా కొరికాడు. దీంతో ఆ బాలుడి చేతి నుంచి వీడిన ఆ నాగుపాము చనిపోయింది.

అనంతరం పాము కాటువేసిన సంగతిని తన తల్లిదండ్రులకు దీపక్‌ చెప్పాడు. దీంతో వారు అతడ్ని వెంటనే ఆసుపత్రికి తీసుకెళ్లారు. డాక్టర్లు పాము కాటును పరిశీలించారు. పాము కాటు వేసినప్పటికీ విషం చిమ్మలేదని తెలిపారు. దీంతో ప్రమాదం ఏమీ లేదని చెప్పారు. ముందు జాగ్రత్త కోసం ఆ బాలుడికి విషం విరుగుడు ఇంజక్షన్‌ ఇచ్చారు. ఒక రోజంతా పరిశీలనలో ఉంచిన తర్వాత ఆసుపత్రి నుంచి డిశ్చార్జ్‌ చేశారు.