Tamil Vetrikondan | ఆ ఎమ్మెల్యే కొడుకు పేరు టీవీకే..! నామకరణం చేసిన సీఎం విజయ్‌

Tamil Vetrikondan | టీవీకే చీఫ్(TVK), సీఎం జోసఫ్‌ విజయ్, టీవీకే ఎమ్మెల్యే ఎంఆర్ పల్లవికి పుట్టిన శిశువుకు అధికారికంగా ‘తమిళ్ వెట్రికొండన్’ అని నామకరణం చేశారు.

తమిళనాడు : టీవీకే చీఫ్(TVK), సీఎం జోసఫ్‌ విజయ్, టీవీకే ఎమ్మెల్యే ఎంఆర్ పల్లవికి పుట్టిన శిశువుకు అధికారికంగా ‘తమిళ్ వెట్రికొండన్’ అని నామకరణం చేశారు. ఎమ్మెల్యేలు, ఎమ్మెల్యే కుటుంబ సభ్యుల మధ్య పండగ వాతావరణంలో సచివాలయంలో జరిగిన ఈ కార్యక్రమంలో ముఖ్యమంత్రి ఆ పసికందును ఆప్యాయంగా ఒడిలోకి తీసుకొని పేరు పెట్టి ముద్దు చేశారు. కాగా, ఎం.ఆర్. పల్లవి తిరు-వి-కా నగర్ నియోజకవర్గం నుంచి టీవీకే తరఫున తొలిసారిగా ఎమ్మెల్యేగా ఎన్నికయ్యారు.

నిండు గర్భిణిగా ఉన్నప్పటికి ఇంటింటికి ప్రచారం చేసి ఆమె వార్తల్లో నిలిచారు. అయితే పల్లవి టీవీకే పార్టీ మొదటి అక్షరాలు కలిసొచ్చేలా బిడ్డకు పేరు పెట్టాలని బలంగా కోరుకున్నారు. ఇదే విషయాన్ని సీఎం విజయ్‌ దృష్టికి తీసుకెళ్లారు. సానుకూలంగా స్పందించిన సీఎం టీవీకే పార్టీ స్ఫురించేలా తమిళ్ వెట్రికొండన్ (TVK) అని పేరు పెట్టారు. అయితే ‘తమిళ వెట్రి కొండన్’ అనే పేరు విజయ్‌ నటించిన రాబోయే జననాయగన్‌ చిత్రంలో విజయ్ పాత్ర పేరు కావడం విశేషం.