Visit:
గుక్కపట్టిన కన్నపేగు
కుప్పకూలిన నినుగన్నవారు
ఆశ్యర్యంలో బంధువర్గం
ఎలా? ఎందుకు? ఎప్పుడు?
ప్రశ్నల వర్షంలో నీ పరివారం
వాట్సాప్ స్టేటస్లో నీ నేస్తాల
ప్రేమ సుగంధపు వెల్లువలు
అప్పటివరకు ఇన్ని బంధాల
చిక్కుముడుల్లో ఉన్న నువ్వు
నిద్రావస్థలో లీనమైపోతావ్
నీ చుట్టూ ఉన్నా నలుగురు
నిన్ను బాడీ..బాడీ అని సంబోధిస్తూ
నడిరోడ్డు మీదకి తీసుకొస్తారు
కన్నీటితో కొందరు, మౌనంతో కొందరు,
బాధను వెళ్లగక్కుతూ ఉంటారు
వీధంతా జనసందోహంతో నిండిపోతుంది
ఎలా భువినొదిలావో తెలియక
ప్రవచనకర్తల్లా గుంపుగా కూర్చొని
ప్రసంగాలు అల్లుకుపోతూ ఉంటారు
తదుపరి నిన్ను పూలవర్షంతో గర్వంగా
నలుగురు మోస్తూ తీసుకెళ్తూ ఉంటే
నిన్నటివరకు నిన్ను పలకరిస్తూ నవ్విన ఆమె
తలుపు ఠక్కున వేసుకుంటుంది
ఎందుకంటే నువ్విప్పుడు శవం
నీపై చల్లిన పూరేకులు అమంగళమైనవి
మీ ఇంటికొస్తే ఆమెకు అంటు మరి
మీ వీధి చివరలో నీ ఫొటో గాలికి
అటు ఇటు ఊగుతూ వెళ్లిపోయేవారికి
నిన్ను గుర్తు చేస్తూ ఉంటుంది.
నువ్వు భువినొదిలిన క్షణం నిదానంగా
మరుగున పడిపోతుంది
గోడమీద జ్ఞాపకంలా
మదిలో నిన్ను చెరగని ముద్రగా
లిఖించుకున్నవారు మాత్రం
తలుస్తూ కుమిలిపోతూ
జనజీవన స్రవంతిలో కలవలేక,
కలిసినట్టు నటిస్తూ బ్రతికేస్తుంటారు
– వాసి జ్యోత్స్న
9866843005
