రోజురోజుకీ ఉష్ణోగ్రతలు పెరుగుతూనే ఉన్నాయి. పర్యావరణంలో వచ్చే మార్పులు కూడా అధిక వేడికి కారణం అవుతున్నాయి. వేసవి వేడిని తట్టుకోవడానికి కూలర్లు, ఏసీలను ఎక్కువగా ఉపయోగిస్తుంటారు. కానీ, ఏసీ ఎక్కువగా వాడటం ఆరోగ్యానికి మంచిది కాదనేది నిపుణుల సూచన. అయితే, వేసవి తాపాన్ని తగ్గించుకునేందుకు ఇంట్లోనే చిన్న చిన్న మొక్కలను పెంచుకోవాలని సూచిస్తున్నారు నిపుణులు. కొన్నిరకాల మొక్కలను ఇంట్లో పెంచుకోవడం వల్ల వాతావరణం ఆహ్లాదంగానే కాకుండా చల్లగా కూడా ఉంటుంది.
బేబీ రబ్బర్
ఇంట్లో పెంచుకునే అందమైన మొక్కల్లో బేబీ రబ్బర్ కూడా ఒకటి. ఈ మొక్క చిన్నగా ఉంటుంది. దీనిని ఇంట్లో ఎక్కడైనా సులభంగా పెంచుకోవచ్చు. దీనికి ప్రతిరోజూ నీరు పోయాల్సిన అవసరం కూడా లేదు. ఇది వాతావరణాన్ని చల్లగా మార్చగలదు కూడా. ముఖ్యంగా వేసవిలో ఇళ్లలో ఈ మొక్కను పెంచడానికి చాలామంది ఇష్టపడతారు.
ఫైకస్
ఇంట్లో పెంచుకోవడానికి అనువైన మొక్కలలో ఇదీ ఒకటి. దీన్ని ఒక చిన్నపాటి కుండీ లేదా తొట్టెలో పెంచుకోవచ్చు. ఈ మొక్క గాలిని శుద్ధి చేస్తుంది. అంతేకాదు, వేడిని తగ్గించడంలో కూడా సాయపడుతుంది.
మనీ ప్లాంట్
మనీ ప్లాంట్ గురించి తెలియని వాళ్లు ఉండరు. వాస్తు శాస్త్రం ప్రకారం ఈ మొక్కను ఇంట్లో పెంచుకుంటే మంచిది అని చాలామంది చెబుతుంటారు. ఈ మొక్క ఇంటికి అందాన్ని మాత్రమే కాదు గాలిలో స్వచ్ఛతను కూడా పెంచుతుంది.
ఫెర్న్
వేసవిలో ఇంటిని చల్లగా ఉంచగల మొక్క ఇది. నిండా ఆకులతో కనువిందు చేసే ఫెర్న్ గాలిలో తేమను నిలిపే గుణం కలిగి ఉంటుంది.
కలబంద
వేసవి కాలంలో ఇంట్లో కలబంద మొక్కల పెంపకం ప్రయోజనకరంగా ఉంటుంది. కేశ సంరక్షణకు, చర్మ సౌందర్యానికి ఉపయోగపడే కలబంద గది ఉష్ణోగ్రతలను క్రమబద్ధీకరించడంలోనూ గుణం చూపిస్తుంది. ఫలితంగా ఇంట్లో వాతావరణం చల్లగా ఉంటుంది.