‘సరైన లోదుస్తులు ధరించండి’… క్యాబిన్‌ సిబ్బందికి పాకిస్థాన్‌ ఎయిర్‌లైన్స్‌ ఆదేశం

పాకిస్థాన్‌ ఎయిర్‌లైన్స్‌ సంస్థ ఇటీవల అంతర్గతంగా జారీ చేసిన ఒక ఉత్తర్వుపై విమర్శలు వెల్లువెత్తాయి. ‘సరైన లోదుస్తులపై’ సరైన ఫార్మల్‌ డ్రెస్‌ ధరించాలని అంతర్గత మెమోలో ఆ సంస్థ పేర్కొంది.

ఇస్లామాబాద్‌: పాకిస్థాన్‌ ఎయిర్‌లైన్స్‌ సంస్థ ఇటీవల అంతర్గతంగా జారీ చేసిన ఒక ఉత్తర్వుపై విమర్శలు వెల్లువెత్తాయి. ‘సరైన లోదుస్తులపై’ సరైన ఫార్మల్‌ డ్రెస్‌ ధరించాలని అంతర్గత మెమోలో ఆ సంస్థ పేర్కొంది. ఈ మేరకు జియో టీవీ వెల్లడిచింది. ఆ టీవీ కథనం ప్రకారం పాకిస్థాన్ ఇంటర్నేషనల్ ఎయిర్‌లైన్స్ (పీఐఏ) తన క్యాబిన్ సిబ్బందికి ఇటీవల అంతర్గత సూచనలు జారీ చేసింది. ‘కొంతమంది క్యాబిన్ సిబ్బంది ఇంటర్‌సిటీలో ప్రయాణిస్తున్నప్పుడు, హోటళ్లలో బస చేస్తున్నప్పుడు, సందర్శనకు వెళ్లినప్పుడు సాధారణ దుస్తులు ధరించడం చాలా ఆందోళన కలిగిస్తున్నది. అలాంటి డ్రెస్సింగ్ విధానం చూసేవారికి పేలవమైన అభిప్రాయాన్ని కలిగిస్తుంది. అలాగే వ్యక్తిగతంగా మాత్రమే కాకుండా సంస్థపైనా నెగిటివ్‌ ఇమేజ్‌ కలిగిస్తుంది. ఈ నేపథ్యంలో క్యాబిన్ సిబ్బంది ‘సరైన అండర్‌గార్మెంట్స్’పై సరైన ఫార్మల్ డ్రెస్‌ ధరించాలి. ఆ దుస్తులు కూడా పాకిస్థాన్‌ సంస్కృతి, జాతీయ నైతికతకు అనుగుణంగా ఉండాలి’ అని అంతర్గత మెమోలో పేర్కొంది. అయితే ఈ అంతర్గత ఉత్తర్వుపై విమర్శలు వెల్లువెత్తాయి.

మరోవైపు పాకిస్థాన్ ఇంటర్నేషనల్ ఎయిర్‌లైన్స్ (పీఐఏ)కు చెందిన క్యాబిన్‌ సిబ్బంది అదనపు డ్యూటీ సమయాలపై నిరసన వ్యక్తం చేస్తున్నారు. ఇంటర్నేషనల్ ట్రాన్స్‌పోర్ట్ వర్కర్స్ ఫెడరేషన్ కూడా ఇటీవల ఈ విషయంపై పీఐఏ సీఈవో అమీర్ హయత్‌కు లేఖ రాసింది.