ఉక్రెయిన్పై రష్యా గత ఎనిమిది రోజులుగా బాంబులతో దాడులు చేస్తూనే వుంది. ప్రధాన నగరాలతో పాటు సామాన్య పౌరులపై కూడా పాశవికంగా దాడులకు దిగుతూనే వుంది. ఉక్రెయిన్ ప్రజలను, ప్రభుత్వాన్ని ఎన్ని విధాలుగా ఇబ్బందులకు గురిచేయాలో.. అన్ని విధాలుగా రష్యా సేనలు ఇబ్బందులు పెడుతూనే వున్నాయి.. తాజాగా మరో కొత్త కోణం ఒకటి వెలుగులోకి వచ్చింది. రష్యాకి చెందిన కొందరు సైనికులు.. తమ చేతుల్లో గ్రెనైడ్ బాంబులను ఉంచుకొని.. ఉక్రెయిన్ ప్రజలను భయభ్రాంతులకు గురి చేస్తున్నారు. ఈ వీడియోలు బయటకు వచ్చాయి. అయితే.. ఉక్రెయిన్ ప్రజలు ఏమాత్రం భయపడకుండా.. వారికి అంతే దీటుగా సమాధానమిస్తున్నారు. ఎంత భయభ్రాంతులకు గురి చేసినా… తాము మాత్రం రష్యా సైనికులకు మోకరిల్లే ప్రసక్తే లేదని తేల్చి చెబుతున్నారు.
రష్యా సైనికులు ఏకంగా గ్రెనైడ్ చేతుల్లో పట్టుకొని, నేరుగా ప్రజల మధ్యలోకి వెళ్లి.. భయపెడుతున్నట్లు తెలుస్తోంది. ఇలా చేయడం ద్వారా ఉక్రెయిన్ ప్రజలు భయపడి, తమకు లొంగిపోతారన్నది రష్యన్ సైనికుల వ్యూహం. అయితే.. రష్యా సైనికులు గ్రెనైడ్లతో సమీపిస్తుంటే.. ఉక్రెయిన్ ప్రజలు షేమ్.. షేమ్.. అంటూ పెద్ద ఎత్తున నినాదాలు చేస్తున్నారు. తాము ఎంత మాత్రం రష్యా సైనికులకు లొంగిపోమని, తాము పోరాటాన్నే ఎంచుకుంటామని ఉక్రెయిన్ ప్రజలు స్పష్టం చేశారు.