Emergency Door | టేకాఫ్‌కు ముందు.. విమానం ఎమర్జెన్సీ డోర్‌ తెరిచి కిందకు దిగిన వ్యక్తి

Emergency Door | ఆ వ్యక్తి వెంటనే విమాన ఎమర్జెన్సీ డోర్‌ వద్దకు పరుగెత్తాడు. దానిని తెరువడంతోపాటు స్లిడ్‌ను యాక్టివేట్‌ చేశాడు. విమాన సిబ్బంది, ప్రయాణికులు చూస్తుండగా స్లిడ్‌ మీదుగా కిందకు జారాడు. దీంతో అక్కడ ఉన్న లగేజ్‌ సిబ్బంది ఆ వ్యక్తిని పట్టుకున్నారు.

వాషింగ్టన్‌: విమానం టేకాఫ్‌కు సిద్ధం కాగా, ఒక వ్యక్తి ఎమర్జెన్సీ డోర్‌ (Emergency Door)తో పాటు స్లిడ్‌ను తెరిచాడు. దాని మీదుగా జారి విమానం నుంచి కిందకు దిగాడు. ఈ సంఘటనతో విమాన సిబ్బందితోపాటు ప్రయాణికులు ఆందోళన చెందారు. ఎయిర్‌పోర్ట్‌ పోలీసులు అతడ్ని అరెస్ట్‌ చేశారు. అమెరికాలోని లాస్ ఏంజిల్స్‌లో ఈ సంఘటన జరిగింది. శనివారం సీటెల్‌కు వెళ్లే డెల్టా ఎయిర్‌లైన్స్ విమానంలోకి ఒక గుర్తు తెలియని వ్యక్తి ప్రవేశించాడు. విమానం డోర్‌ మూసుకుంటుండగా దాని వద్దకు పరుగెత్తాడు. ఇప్పుడు నేను ఏం చేయాలి అని విమాన సిబ్బందిని ప్రశ్నించాడు. సీట్లో కూర్చోవాలని సిబ్బంది అతడికి చెప్పారు.

కాగా, ఆ వ్యక్తి వెంటనే విమాన ఎమర్జెన్సీ డోర్‌ వద్దకు పరుగెత్తాడు. దానిని తెరువడంతోపాటు స్లిడ్‌ను యాక్టివేట్‌ చేశాడు. విమాన సిబ్బంది, ప్రయాణికులు చూస్తుండగా స్లిడ్‌ మీదుగా కిందకు జారాడు. దీంతో అక్కడ ఉన్న లగేజ్‌ సిబ్బంది ఆ వ్యక్తిని పట్టుకున్నారు. అనంతరం ఎయిర్‌పోర్ట్‌ పోలీసులకు అప్పగించగా అతడ్ని అరెస్ట్‌ చేశారు. ఆ వ్యక్తి మానసిక స్థితిని తెలుసుకునేందుకు ఆసుపత్రికి తరలించారు.

మరోవైపు ఈ సంఘటనతో టేకాఫ్‌ కావాల్సిన ఆ విమానం నిలిచిపోయింది. భద్రతా కారణాల వల్ల అందులోని ప్రయాణికులను కిందకు దించి వేశారు. మూడు గంటల తర్వాత వారంతా డెల్టా ఎయిర్‌లైన్స్‌కు చెందిన మరో విమానంలో సీటెల్‌కు ప్రయాణమయ్యారు.